Kohima nung ‘transformation crusade’ mungdar

Kohima, February 27 (TYO) : Tang Kohima Local Ground nung temungdak aliba ‘transformation crusade’ tasemnü buba nung nisung 5000 shi adenshia liasü. Iba sentong nung o jembir Rev. Zotuo kiewhuo liasü. Pai ‘Arise and Shine’ (Isaiah 60:1) onük nung ajemdaker Tsüngrem o jembi.
O jembidang pai, satanji ammang tanela lir aser pai tesangwa metizükteter, ta ashi. Pai Yisuji dang alima tesangwa aser Pa tesangwaji asenok dak yalokdaktsütsüla, ta tesentepertem ayongzük.
Temeshi Laishiba nung ajemdaker sentepa alirtem dang pai, alima nung tanela asem lir aser itemji nisung, temeshi aser temenem tanelatem lir, aser item tenelatem rongnung temenen tanelai tiyazü tenangzükba agütsür kechiba süra ibai ammang tanela lir, ajisüaka shirnoki Yisu den jajadir tesangwa nung jajatsü kechiba süra Yisuji Tesangwa lir, ta ashi. Tsüngremi nü temenen meteta lir saka taitok agütsür, Pai nisung ka tanela temeshi agi sünga kümdaktsür aser tatem anogo nung alima ajak manga akümdang Pa tesangwa yaloktsütsü aser meimchirtemi iba tesangwa bushia arutsü, ta Luke 21: 5-38 nung ajemdaker ashi.
Iba sentong nung temenen tanela külemer nisung 50 shi temenen talenba nungi salatsü aser manemi alir aika taneptsü angu.
Sentong tenzüka Toshi Imchen-i sarasadem, Vezopra Rhakho-i sentong ketdang asü aser teloki “To God be the glory” ken atendang Vizosietuo Neo aser Mhasi Keretsü nati keyboard atem.