AAP sorkari advertisement tasen ka sayaogo

New Delhi, July 24 (Agencies): Dellhi nung Arvind Kejriwal-i aniba sorkari lenmang tezülen sign board tulu kar azüngogo aser Ato Kilonser Narendra Modi dang iba maparen menokdaktsü mepishia metetdaktsüogo.

“Ato Kilonser, imlibilema Delhi sorkar teinyaktsü tem inyakdakjang. Onoki inyakba ya shitak inyaker,” ta sign board tasentem nungji zülua lir.

Advertisement tanga aser TV advertisement tem nungbo shingaia Ato Kilonser dang yamai chitepa mashir saka AAP telokibo iba mapa ajanga pa den chitepa jembir.

Item sign board ji nüburtem meyong rongsen indoker, ta congress-i Chief Minister aitsüogo.

“Iba maparen nung majung kaji, Chief Minister, Arvind Kejriwal-i nüburtem meyong rongsen laluogo. Pa ajungkettsü meji nung tax saruba sen amshir. Ibai tim masü,” ta Delhi nung Congress lenir Ajay Maken-i ashi.

Tan Delhi sorkari iba advertisement maparen inyakba ajanga opposition nungi taitsüba nguogo. Taoba ita mezüng budget amenba mapang, Delhi sorkar-i advertisement maparen atema sen crore 520 inoka ayu. Yakümbo iba ama maparen asoshi sen crore 20 dang lateta yua liasü.

Iba advertisement mapa ya Aam Aadmi Party sorkar aser Lt. Angh Najeeb Jung na yongtsü ‘Delhi Commission for Women’ nung tekolak menden shimyim nung mangatettep adoka aliba mapang ka nung lir.