JNU ken o Special Cell nem agütsür: BS Bassi

New Delhi, Feb. 27 (Agencies): Tanü Delhi Police Commissioner, BS Bassi-i, JNU dak sentakba ken o Police Force indang counter-terrorism unit, Special Cell dangi benogo, ta metetdaktsü.
Osangbenertem den jembidang Bassi-i, “Ni ozü kedangsertem dang iba ken o ya Special Cell nem agüjang ta tuyuogo, kechiyong iba ken o ya kanga nendaka bushisüngdangtsü nüngdaker. Section 124 A (Sedition) kübok benokba ken o nung Special Cell-i ochishia inyaktsü,” ta ashi. Ken o belentsü maparenji anogo ana tsüngda tembangtsü, ta pai ashi.
Paisa, local police district-i nendaka bushisüngdang mesüteter, kechiyong iba ken o ya tzüzüng ozüng aika den sentaktepa inyaktsüsa akümer, ta ashi.
Feb. 9 nü JNU campus nung atalokba ken o benokba sülen anogo ishika lir DCP (South), Prem Nath-i Commissioner Bassi dang iba ken o ya Special Cell nem agüjang ta mepishia liasü. Ajisüaka Bassi-i ibaji memelungi, police district-i iba ken o bentettsü koka lir ta shia liasü.
JNU nung atalokba ken o nung February 12 nü JNUSU Tir, Kanhaiya Kumar pua lir. Kasa ken o nungsa kaketshir ana- Umar Khalid aser Anirban Bhattacharya na anogo 10 police tsüngdang jenshiba sülen parnok sasa police nem pudaktsüogo.
Kanhaiya-i Supreme Court indang panel lawyer tem dang, Feb. 17 nü pa Patiala House court-i anir aodang police lia lawyer temi pa dak azük, saka police-i kecha meinyak, ta ashiba video news channel aika nung tanü sayuogo.
Iba dak sentakba nung SC panel züngsemtemi DCP, Jatin Narwal dang, “Court telungtet nung azüktsüsa kechiba nai mela (?) Ner nisungtem (police) yangji liasü. Parnok kechi repranga liasü (?)” ta asüngdangogo.
Panel-isa Narwal dang, “Pa kümzüka alitsüji nü khuret asütsü. Tangbo na B S Bassi kübok masü saka Supreme Court tetuyuba kübok lir,” ta shiogo.