Nisung crore 125-i ni tendangtsü: PM Narendra Modi

New Delhi, February 28 (Agencies): Tanü Deobarnü Ato kilonser, Narendra Modi-i, Hombarnü Parliament nung linük budget benokdang nisung crore 125-i ni tendangtsü ta ashi.
Ita shia Ato kilonseri radio ajanga jembiba programme ‘Mann ki Baat’ nung jembidang Modi-i, kaketshirtem dang kecha teratai makai tatidang agütsütsüla, ta ashi.
Pa tatidang agütsütsüpurtem dang, “Ni asüng tatidang ka lir. Nisung crore 125-i ni tendangtsü, kechiyong Parliament nung budget benoktsü. Ajisüaka ni temelung alemer aser nenok-a takok angutsü sarasademtsür,” ta ashi.
Kasa sentong nung Ato kilonser Modi den cricket asayar nüngtugu, Sachin Tendulkar aser chess asayar nüngtugu, Vishwanathan Anand nata liasü, aser tenatia tawa tadidang agütsütsüpur kaketshirtem ajungshia jembiogo.
Kaketshirtem dang Tendulkar-i, “Nai tajung imlatsüla aser tajungji atangji nü sülen anidaktsü. Nai alizüng ka ayutsüla aser ibaji atongtsü merangtsüla,” ta ashi.
Ano Anand-ia, board exam tebilemtsüji asen taküm nung tain kümer ajangshiba tayongzükba den mesüktepa lir, ta ashi.
Chess asayar mongin Anand-i, “Shisatsü kanga süngjema alitsüji kanga tongtibang. Iba ya chess asaya ka mesük. Süngjema alitsüla, kanga tali-a nü dak melung malemtsüla, ajisüaka ano temelung melemi-a malitsüla,” ta ashi.
Modi-i kaketshir ka taküm nung azüokba alitsüji kanga tongtibang, aser tatidang nung takok angutsü lenmang tajungtibaji nü shisatsü süngjema alitsüla, ta ashi.
“Taküm nung takok angutsü atema tajemtaktak tashi aittsü sabiji tazüokba lir. Nü shisatsü süngjema lira nai shisatsü tzüpokdak angutsü aser tatidangji na atema temalaba akümtsü,” ta Modi-i ayongzük.
Modi-i nüngtugu scientist, CNR Rao dang pa taküm nung ajangshibatem kaketshirtem den lemsateptsü jilia asüngdanga liasü.
Rao-i, “Tatidang ajanga tarentak tetsübu kadaktsür ta ni junga jangjaogo, ajisüaka shisa mebolui tajungtiba inyaktsüla. Iba linük nung maongka aika lir. Nai taküm nung kechi aginer’ar lemtetang aser iba nungjagi mepilatsüla,” ta ashi.