Merükmejutsü nüngdaker

Alima nung nisungtem tashitemetet akümba o merükmejuba na ya sendaktepa lir, kechiyong tashitemetet agi merükmejua alitsü sayur. Merükmejua alitsüba ya tajung saka memetet aser merajemba agi merükmejua malir. Aji oda, asenoka asen limai Khristan yimsü den kaketshisatsü angazüktsüsa mapang tajung ka maru tashibo merükmejua alitsü memeteti liasü. Iba ama putu nungbo ki ka nung azü, ak aser an den külemi liasü. Metsümeshidak balaka yanglua mali asü, anungji nisungtemi tugulen metsümeshiba ajak azü aser aktemi dang chia anidak. Tzü mechigo, ki maok, sü mashi aser kima kilong merüka mayu. Aji oda, jana ona ajak mashimashi nung endok. Iba amaji asenok tsüraburtem libaliroji shirurutem dena mebendang tesempatsüka libalirua liasü. Tanübo item tesempatsü libaliro aika meshimeshia endoker asenok ajaki akok tashi merüka alitsü meranger. Ibaji asenok tashitemetet küma tejakleni aoba temaitsü lir. Ibayongji, tanübo asenok shiururu den külemi malir, moapu nung metsümeshi masür, süoshi temerük agir, chiyongtsü temerük achir aser kiojen merükmerüka ayur. Ajisüaka, asenok dak tashimait ka lir, iba tashimait jagi asen lima menendaktsür. Iba tashimaitji asenoki asenok kija merüktsü asoshi dang bilemer. Iba jagi asenoki yangluba yimkong meyong metsümeshidakbo merükteta meyutetter. Tanga tesemtembo toktsür, Kohima nung Chief minister aser Chief Secretary nati anir tulur ajak amendak Civil Secretariat nung metsümeshidak intangbo tezüknem menemba agi ajanga süia majung yua lir. Iba kasaji asen kilong aser kima tashi merükerbo asenoki asen kima yimdongbo asenok meyong masü amai janar yutsür. Yimten , arogo mesüra kaketshir telok ka lokti sentong ka ayongzüka chiajemra, idakji amshiba auso marok aser janaona ajak kilentsü nung nangoka toktsür. Tang tashi asenoki sali metsü metsütsü atema kilong nung kinük bushia aoer mesüra mi apudak metsüloka toktsür mesüra kimalen naro topur junga tema alidak metsüloka toktsür. Atangji, asenok aliba ki, asenoki asemba süoshi, asen senzüba gari aser asen libaliro apibo asenoki kima yimdong nung jajadanga yimdongdakbo kaket tilaka shizüka meindoknütsüka, ajisüaka asenoki asen libaliro den mesütep aser meputep asenoki asenoksasa asen kima yimdong menener. Atangji, tanü ama masü akhidangbo kima yimdong janatsüsa osettsüset aika mamshi, anungji kiset shirurutemi janaba jana dak alaka süjensüra, kaket aser polythene bag nungertem amala kecha mali asü. Ajisüaka, tanübo anogo shia kibong ka nung janaona endoktsüsa asenoki agiba aser chiyongba nungi adokbatemji aika adoker. Aji oda, kibong shiai pei kidang janabaji lenmang tezü nung endokra mesüra kilentsü nung enoktsüra, iba jagi tenem küma mejungketa atur aser alima topur ajung dang masü saka tzü mopong menendaktsür. Iba ama tebilemtsü ka asenok libaliro nung reprangtetba agi taoba hopta nung asenoki ” Nagaland nung merükmeju dak sendakba maparen ketdangsüa reprangtsü aser aibelenertem merenshitsü atema sorkari department kar mesüra police nem mapa nungloktsü nunga koma süla ?” ta asenoki shisadangogo. Iba jagi asenok nem teshisadangtsü lenmang kabosa lapoktsür asütsü ta bilemer. Atangji, iba tasüngdangba langzürtemi ashiba amato, alima ajungtsüba ya temerenshi agütsüba agi masü saka tangatetba agütsüba agidang ajungtsü, anungji asenok rongnung kati ka ajungshitepa tangatetba agütsütsüla. Tangbo asenoki asen lima merüka meyutetba ya memetet aser marajem agi masü saka asenoki yimkong masü asen kija ajungtsü bilemba ajanga lir. Ibayongji, asen kija alidak aser senzüdak tesembo tajung aser temerük saka yimkong alidak aser jajadakbo memerük ta angutsü. Aji oda, kija kibongbo takar saka sorkar-bo sensaker ta asüba timtemjia asenoki asen kija agitsü, kija ajungtsü aser kija dang ajangzüktsü bilemba ajanga lir. Iba jagi asen kibo topur tajung saka yimdong majung, asenok tejakbo topur tajung saka asen yimtibo topur majung ta angutsü. Aji oda, asenok yimdong aser yimti topur majungtsüsa janaba agi asenok dena topur mejungi tangari reprangdagi ta asenoki bilema, kilong aser kima dang masü yimdonga dena asen ki amato bilema merükmejua alitsü kanga nüngdaker.