TN nung “Abdul Kalam Vision India Party” tentet

Rameswaram, February 28 (Agencies) : Taoba Tir APJ Abdul Kalam atema Scientific adviser inyaker V Ponraj-i Deobarnü “Abdul Kalam Vision India Party” ta ser yimten telok ka tentetogo.
V Ponraj-i tanü osangbener dang ashiba agi, taruba Tamil Nadu assembly elections nung par teloki constituency 234 prongla nung tokteptsü.
Otsü tasen ka adokdaktsütsü aser lanur o kaketshirtemi Indian politics nung temelenshi aginüba mangdang asangsang nung atalokdaktsütsü atema Abdul Kalam Vision India Party tentet, ta paisa metetdaktsü.
Iba party tentetba ajanga Tamil Nadu nung yimtenren tsütsü temelenshi dang masü saka tebilemba nunga temelenshi adokstü, ta Ponraj-isa shisem.
2015 küm tzümetsüng lendong ajanga Chennai yimti nung lanur aser kaketshirtem longjemdaktsü. Sorkari iba timtem nungi nübortem mekümzüktetdang, lanurtemi nisung meyirjang aika kümzük, ta paisa ashi.
Tzümetsüng mapang lanurtem saksalemdaktsüba ajanga state nung yimten mapa nunga temelenshi bener arutsü. Party-i anogo 15 nü atema lanur nem training agütsütsü aser taruba assembly elections nung toktepdaktsütsü, ta Ponraj-isa osangbener dang ashi.
Lok Nayak Jayaprakash Narayan-i linük nung yimtenren temelenshi ka aginüba mapang mesüka tanü asen linük tensa lir aser lanurtemi temelenshi ochimashi aser tashiyim samadaktsünür, ta Ponraj-isa shisem.
Tanü Ponraj-i asür Abdul Kalam leper nung tetushi agütsüba sülen party tasenji tenzük. Ajisüaka, Kalam tedi tambusang APJ Muthumeeran Lebbai Maraicair-i ashiba agibo pa tenui yimten telok tentettsü anema noktak aser yimten mapa nung mejangra.