Aluyimertem anasü agi jenjang tajungba kümtsütsü: Modi

New Delhi, February 28 (Agencies): Hombarnü Union Finance Minister, Arun Jaitley-i Union Budget benoktsü lia tanü Uttar Pradesh, Bareilly nung aluyimertem lokti senden nung jembidang Ato kilonser, Narendra Modi-i, 2022 küm tashi nungbo aluyimertem senotsü anasü agi jenjang tajungba akümtsü, ta ashi.
Iba sentong ya Modi’er sorkari aluyimertem asoshi benokba scheme balala indang rajema kümdaktsütsü atema ayongzükba senden ka liasü.
Ato kilonser-i, “India nunger nüjiso ngur küm 75 ajungba benjungmung küm, 2022 tashi nungbo aluyimertem senotsü jenjang anasü agi tajungba kümdaktsüner. Tanübo aluyimertemi kibong nung züngsem ka nembosa mapa inyakdaktsüner, kechiyong parnoki aluyimba kija agibo tepok masüngtsü ta bilemer,” ta ashi.
Aluyimertem ya linük atema nümadangtsü lir ta shia Modi-i, lenmang nung tayongzükba jenti lir, ajisüaka itemji maongka akümtsü koka lir, ta ashi.
“Ni Uttar Pradesh sorkar kija dang masü saka state balala sorkar ajak dang aluyimertem aser aluyimba tsütsü onüktem atema tongtibangsüa inyaktsü mepishir,” ta pai ashi.
Modi-isa aluyimertem dang Pradhan Mantri Fasal Bima Yojana scheme kübok tajangzük ajak agitsüla, ta ashi.