Irom Sharmila ano lumitsü tenzüker

Imphal, March 01 : Manipurtsür Irom Sharmila Chanu, shibai Manipur nungi Armed Forces Special Powers Act agientsüla ta küm 15 tashi maneni lumia akanger, la tepuokdak nungi yashi chiokba sülen ano maneni kasa takangba agüja lumi tenzükogo.
Irom Sharmilai iba ama ozüng tamajung ya agientsüla ta 2000 küm November 4 nü nungi lumia longkak aittsü tenzük, saka lai lasasa la tepsettsüsa inyaker ta aija police-i la apu aser obendanger ket nung yur Jawaharlal Nehru Institute of Medical Sciences Hospital nung anepalua aruba sülen yashi judicial custody nungi la chiokba saka lai ano maneni tanü nungi kasa takangba agüja lumitsü tenzükogo.
Lai osangbenertem den jembidang, tashiyim amshia taginüba ka akangbaji tim masü, anungji nibo tashiyim mamshii ano Manipur nungi iba ozüng tamajung agientsü asoshi takangba agüja lumitsü ta metetdaktsü.
Tanü sorkari la temang reprangtsü asoshi doctortem yok saka lai mereprangdaktsü.
Sorkari ni melumidaktsütsü asoshi sen jenti endoka ni anepalur, saka ibaji tim masü, iba senji nüngdakba purtem nem lemtsütsüla ta lai metetdaktsü.