Adolescent Club-i Tsusapang Sector nung sentong agi

Dimapur, March 1 (TYO) : Mokokchung District nung Adolescent club-i February 28, 2016 nü Adolescent Health indang District level IEC/BEC activities shilem tanabuba agi.
Iba sentong ya Tsusapang sector nung ayongzüka agi aser Adolescent Club züngsemtemi anojungi tanur abenba ajanga timtem bener arutsüba aser kibalembutsü arishi küm indang Street play ia sayu.
Adolescent club Tir, Zulu-i anojungi tanur abenba nung lendong aser social networking addiction indang onük jembi.
Anojungi tanur soa bentsürtem temang nung timtem aika adoker aser arishia tatsüba alir, ta Zulu-isa ashi.
Paisa, social networking kanga amshiba indang onük jembidang, nisung karbo anogo piyong social sites nung sensaksemdang mapang amajok nung endoker aser iba khuret ajanga pei mapa nung tamakok ngudaktsür, taküm jenjang raksatsür aser tesentaktep raksatsür, ta ashi.
Iba sentong nung Adolescent club züngsemtem den DMEIO, IEC ketdangsertem aser Media Officer nungertem aden.