Nübortem timtem reprangtsüla

February 6 nü Shamator o Kiphire na tsüngda apuani tepsetba ajanga atalokba lendong agi tang tashi Kiphire nung nisung aika melitettsüsa akümba tensa tiaji Kiphire nung alirtem asoshi dang masü saka asenok ajak asoshi tebilemtsü khuret lir.  Atangji, tanga district nung alirtemibo parnok timtembaji tenük agibo mangur asünungji aikati shishia mebilemtsüa akok, saka lendong madak lendong ataloker pei kidanga melitettsüsa akümba tensa tiaji jungjunga bilemdangra temulung ayangtsüka lir. Naga nunger ya kin aika agi akümba telok ka asünungji, Naga nungerbo nisung ana jungtepra ibaji kin ana jungteper amato aser ano nisung ana tsükchitepra ibajia kin ana tsüngda tsükchiteper amato melemelaa kümadoker. Iba jagi mi tila ka mekümdangi amshiba agi ki ajak rongdok amato, o tilaka mekümdangi jembiba mesüra nisung kari mekümdangi lendong mapa inyakba ajanga melamelaa kin o kin na tsüngda tsükchitep adoktsüsa akümer. Naga nunger asoshi tekümdangtsüji aji ka asütsü. February 6 nü apuani kasetertemji shirnok (?) aser kechiba parnokji kaset (?) ta asüba kuliji kodang police-temi nisung khasetertemji pudir, idangji dang metettsü, anungji kechisüdirsüaka nisung khasetertemji aputsüla. Tanü Nagaland nung ozüng liaka mali ama akümbaji nisung tepseter aser ozüng raksartem meputetter aser sorkari nübortem pei kidang tetsübu makai alitsüsa tensa tia meyanglutetter. Ibayongji, nübortemi sorar dak temulung malemer. Ano, iba jagi sorkaria nübortem lendong timtem nung liaka kecha hau ta süoki ia mebilemer. Sorkar nung alir yimsüsür aser ketdangsertem pei kidang aser office nung tanüker teperi yur shisabolu maka aliba jagi state nung yimjung lir ta mesüra nübortem mulung anisüngzüka lir ta mebilemtsüla. Kiphire ama nungji shirnok ki raksatsür aser rongdoktsür tetsübu agi moutet bendanglen tesem balala nung jenoka lir, itemji meyipa pei kidangi otettsüsa aser kiojen raksaba aser rongdokbaji yanglutettsüsa sorkari teyari agütsütettsüla. Atangji, lendong ataloker külen tensa tia reprangdanga nübortem süneptsütsü asoshi state sorkar nungi yimsüsürtem, Naga Hoho, ENPO aser NPF teloktem nungi lenirtem Kiphire tashi oagi tensa ia reprangdanga nübortem ajuruogo. Ajisüaka, parnok orr arubaji masü saka parnok aoba tajangzükji kechi liasü ta asübajiang tongtibang lir.  Aji oda, tang Kiphire nung melitet tanga nung jenoka alirtemi ashiba amaji,  tanü tashi Kiphire nung tensa majungba agi Naga nunger karbo meyipa moutteti lira, sorkar nung alirtem amuia moui nüken belema yimjung asoshi inyaktsüba mapangji tang asütsü. Atangji, nübortem putepa alitsü asoshi sorkari dang masü saka tang inyakba amaji lokti tentet aser arogoia inyaktsüla aser item lokti tentet ajak rongnung talila timtem agia inyaktsüba telokji ENPO asütsü. Nagaland anüdoklen alir Naga kintem longjema alitsü asoshi ENPO tentetba ya kanga junger. Aji oda, tang ama ENPO kübok aliba tesem ka nung kasa nübortem tsüngda temulung melemtep adoka tsükchitepba mapang, mangtettepi aliba nübortem tsüngda yimjung o jembia tangatettep kati arudaktsütsübaji tangar telok aika liaka ENPO-isa süoki taiba ia inyaktsüla. ENPO aser Kiphire nung alirtemi dang masü saka asenok ajaki angatettsüba kaji district headquaters ka mesüra town ka tuluba aser tajungba küma indaktsütsü asoshi iba tesem nungji nisung ajak tetsübu aser tarendak melii pei senso lima ama bilema sademsadema litettsüla. Iba ama tensa mapang ka asenoki asenok alidak meyanglutet tashi asenoki tapu aika bilemaka mataloktsü. Town tulu küma nübortem nüngdakba ajak amenoktsü asoshi nütsüng aika arua alitsü nüngdaker. Nütsüng ali nung dang iba yari terenlok mapa inyaktsü. Asen alidak nütsüng aika arua lira, parnoki asenok lenmang aika nung mesütsü. Parnok dang asenoki parnok nüngdak ayoktsü, parnokji asenok kidang alitsü, asenok kaketreju nung azüngtsü aser asenok mozü kidang taneptsü bushia arutsü. Idangji asenok maparen aika nung ajangzüktsü. Ibaji angateta, Kiphire dang masü saka Nagaland nung tesem ajak nung Naga nungerbo pei town aser pei lima ama bilema sademsadema alitsüsa lenirtemi nübortem nem tangatetba agüja ajungshiteptsüla. Iba jagi dang Nagaland ka akümtsü.