Rural tesem nung pei ki malir ajaki scheme tasenba maongka agitettsü

New Delhi, March 1 (Agencies): Rural tesem nung alir pei ki malirtem ajaki centre sorkari lapoktsüba ‘Housing for All Mission inyakyim nungi maongka agitettsü. Iba sentong nung rural tesem nung alir tilar tulur aser sensaker takar tebendang meli-i shilem agitettsü, ta Mongulbarnü Union rural development minister Birender Singh-i ashi.
“Housing for All Mission kübok nüngdaka alirtem nem teyari agütsütsü asoshi onoki ‘Socio-economic caste’ kübok aliba nütsüng yongsük bendena lir. Ki malir ajaki iba maongka agitettsü aser iba inyakyim nung ‘caste’ tebendang malitsü,” ta Singh-i sangdong ka ajanga metetdaktsü.
Taoba mapang to asübo sorkari Scheduled Caste aser Scheduled Tribes tem nem Below Poverty Line (BPL) teyari agütsüba indang tarensen tama junga repranger külen ang iba central-fund ajanga agütsüba Housing for All Mission maongka agütsüla, ajisüaka tangbo yamaji masütsü, ta minister-i ashi.
“Taoba mapang nung iba maongka agitsü asoshi onoki ‘below poverty line’ nung alirtem zülutena liasü. Ajisüaka tangbo iba inyakyimji melenshiogo. Onoki inyaka aruba nung kar entoktsü aser kar enoksemtsü aser ibaji ajanga ki malir nisung mashi katia iba tarensen nung tenüng agütsütettsü,” ta Birender Singh-i ashi.