Islam yimsü anema jembiba atema BJP MP Hedge anema ken o benok

Bengaluru, March 02 (Agencies): BJP nungi Lok Sabha MP, Ananthkumar Hegde-i Muslim nunger tamangba yimsü, Islam ji kiralongraba den sentaktepa jembiba atema police-i pa anema ken o ka benokogo.

“Iba ken oji Uttara Kannada district, Sirsi nung IPC section 295(A) kübok benokogo,” ta police-i ashi.

Taoba Deobarnü Sirsi nung osangbenertem senden ka nung jembidang Uttara Kannada nungi ponguben tashi MP aser BJP lenir Hedge-i Islam aser kiralongraba na sentaktepa jembi, aser ibaji Muslim tentettemi ashishia liasü.

Iba district kübok Bhatkal jila nungbo Muslim tentettemi lungkak aitba sülen Hedge nem temerenshi agütsütsüla ta district Superintendent of Police, Vamsi Krishna nem tezüluba nung takhangba agütsüogo.

Bhatkal jila ya tamangba lokti tsüngda rara adoktsüsa aliba tesem ka lir, ibayongji jila nung security akangshiogo.

Ano kidanger district, Dakshina Kannada nunga Muslim tentettemi MP Hedge nem temerenshi agüjang, ta takhangba agütsüogo.

Karnataka state Health Minister, U T Khader-i Home Minister, G Parameshwara dang Islam yimsü anema Hegde-i jembiba asoshi ken o benoktsüla ta shiogo.

Ano tanga osang ka nung, tawa Agra nung Union Minister, Ram Shankar Katheria aser BJP MP, Babu Lal nati tamangba lokti tsüngda rara adoktsüsa tesempa o jembiba dak sentakba nung tanü Uttar Pradesh Chief Minister, Akhilesh Yadav-i, kuli anguba nung ajemdaker police-i tena anema inyaktsü ta shiogo.

Yadav-i, “Item ama o jembi ta tai tonglokja aliba indang kuli ajak police ket nung lir. Recording aser tanga kulitem nung ajemdaker iba ken o nung densema alir ajak nem temerenshi agütsütsü,” ta ashi.