Kiralongrartemi Jalalabad nung Indian Consulate amak

Jalalabad (Afghanistan), March 02 (Agencies): Tanü Afghanistan aser India sepaitemi Jalalabad nung bomb amshia Indian Consulate amaktsü meranger kiralongrar pezü tepsetogo aser tajemba agi nisung trok yiruogo, ta ketdangsertemi ashi.
Kiralongrar kati gari nung bomb bena alibaji Indian consulate anasa pokdakja tajemba agi gari 8 poksa, ta osang angazüker.
Nangarhar province Angh atema otongdar Attahullah Khugyani-i, “Parnok nükjidongji Indian consulate amaktsü liasü, saka parnok iba tesem matongdangsa ozü sepaitemi parnok ajak kahset,” ta ashi.
“Iba lendong nungsa nisung asem-civilian ana aser police ka süogo,” ta paisa ashi.
Iba tatalokba sülen New Delhi nung MEA otongdar, Vikas Swarup-i, consulate staff züngsem shinga meyiru, ta shiogo.
Tang tashi nungbo kiralongrar telok kati danga iba amakba tenüng agia mali. Taküm January ita nunga kiralongrartemi Afghan yimti, Mazar-i-Sharif nung Indian Consulate makogo.
Afghan sorkari küm 10 dak tema Taliban kiralongrar den raraa arudar, aser tesüiba ita ishika nung Taliban telokia Nangarhar province yimtiba Jalalabad aiben makogo.