Manipur nung Nagaland CM anema FIR benokba atema metetdaktsür

Dimapur, March 2 (TYO): Manipur nungi MLA, Ibomcha Singh-i Nagaland Chief Minister anema FIR ka benokba osang social media nung kanga prokshir aser iba asoshi Nagaland Chief minister-i kanga süoki ia bilemer, ta tanü Media Cell, Chief Minister’s Office, Nagaland sangdong ka nung metetdaktsü.
Manipur MLA-i Indian Penal Code nung Arrla 124 (A) aser 153 (A) kübok FIR benok aser ibaji February 14, 2016 nü Ukhrul, Manipur nung Nagaland chief minister-i Lui Ngai Li benjung nung jembiba onük atema asütsü ama bilemer, ta sangdong nungsa shia lir.
Benjung nung onük jembidang Chief Minister-i Naga nungertem longjemtsü aser ketdangsübaren balala nung liaka Naga nunger ka küma longjemba ajanga Naga nunger katika yaritepa sobaliba aser lokti tejakleni aotsü indang jembi.
Naga nunger aliba tesemtem ketdangsübaren ka kübok aitdaktsütsübaji Nagaland Statehood otsü den kasa lir, aser 1960 nung India sorkar o Naga People’s Convention tsüngda 16-point Agreement nunga iba indang onük benoka lir, ta Media Cell, CMO sangdong nungsa metetdaktsü.
Nagaland Legislative Assembly-ia December 12, 1964, August 28, 1970, September 16, 1994, December 18, 2003 aser July 28, 2015 anogotem nung Nagaland nung alirtemi Naga nunger ajak ka küma longjemtsü taginüba pusema telemtetba punguben tashi agiogo.
Lui Ngai Li benjung nung o jembidang, Nagaland Chief Minister-i Manipur Assembly nung ashishitep aketba bill asem benokba indang onük jembisemogo aser iba mapang pai Manipur Chief Minister anema jembi.
Nagaland nung Chief Minister ji Naga nunger ajak atema tanishir ka lir aser pai kin mesüra tesem telemsa melii ajak atema jembitsüla. Naga nungertem mulung masüba atema lungkak aitba sentongtem agiba mapang ka nung Nagaland nungi chief minister kati Manipur, New Delhi mesüra Myanmar nunga Naga nunger atema jembitsü temeten lir, ta sangdong nungsa shia lir.
IPC nung Arrla 124A aser 154A nung sorkar anema tesempatep adokdaktsütsü merangba aser telok balala tsüngda tsükchitep dendaktsüba indang shia lir. Manipur sorkari assembly nung ashishitep aketba bill asem benokba ajanga lisopurtemi lungkak aittsü tenzük aser iba mapang ozüng amertemi lungkak aiter nisung 9 tepset aser aika yirutsü. Süra, iba inyakyimjia temalen agüja aliba IPC nung Arrla kübok aittsütsüla.
Manipur sorkari kin kar bendanga amshiba ajanga state kübok aliba kin balala tsüngda yimjung nung putepa alitsüba tensa raksatsüogo. Ajisüaka Nagaland Chief Minister-ibo state ana tsüngda tesentaktep tajung nung alitsü aser ibaji ajanga state ana nung aliba kinten yimjung aser putepa alitsüsa tensa lidaktsünür, ta Media Cell, CMO sangdong nungsa metetdaktsü.