Migrant nisungtemi Europe mebushitsüla: Tusk

Athens, March 03 (Agencies): Pei linük toktsür bendanglen jenoka alitsü merangba migrant nisungtemi Europe mebushitsü tekümdangtsü olen ka European Council (EC) Tir, Donald Tusk-i tanü, Brehostibar nü metetdaktsüogo.

“Greece densema, Europe nung densemba linüktem migrant nisungtemi Europe nung mezüng tetsüng ajemokdak mekümdaktsütsü lemtetogo. Anungji, migrant nisungtemi Europe mebushitsü metetdaktsür,” ta Tusk-i tanü sangoktsü.

Tusk-i Greece Ato Kilonser, Alexis Tsipras den Athens yimti nung ajurutepa senden ka amenba sülen tanü iba olenji metetdaktsü.

Taruba Hombar nü Belgium kübok Brussels yimti nung European Union (EU)-Turkey senden amenba jakdang migrant nisungtem den sentakba khuret benokba linüktem semdanga senzütsü tenzüka, Tusk-i tanü Greece semdangba osang jangjaogo.

“EU-i agiba open-border Schengen tezüngzüktep agi Greece malendaktsüba kisüngi Europe-i tang ajurushia aliba migrant nisungtem den sentakba khuret magientsütettsü,” ta Tusk-isa metetdaktsü.

Tusk-i Greece semdangba sülen maneni Turkey semdanga, par Ato Kilonser, Ahmet Davutoglu den Ankara yimti nung ajurutsü sentong renema lir.

Davutoglu den ajurutepba sülen Tusk-i Turkey Tir, Recep Tayyip Erdogan dena Istanbul yimti nung asüng, Hokolbar nü ajurutepa Turkey aser Greece nati ajurushia aliba Middle East aser Africa toktsür migrant nisungtem den sentakba khuret nung EU-i yariteptsü mulungba osang lemsateptsü alizüng yua lir.

Migrant nisungtem den sentakba khuret benokba jakdang nungi rongsenren timtem ajurushia aliba Greece linükia dollar sen million 500 dak tema agüja par linük yaritsü asoshi EU den onük benokba osanga jangjaogo.