Anünglak senzürtemi alima tasen ka bushitetogo

Florida, July 24 (Agencies): Asen meimchir aliba alima mesükba aser meimchirtem taküm litettsü alima tasen ka anünglak senzürtemi bushitetogo ta US scientist-temi yashi Brehostibar nü metetdaktsüogo.
US nung National Aeronautics & Space Administration (NASA)’er anünglak senzürtemi Kepler space telescope amshia asen lima den shilem 60 agi tuluba alima tasenba ya light years 1,400 shi pilar Cygnus constellation nung aliba bushiteta lir.
“Tan asensüa bushiteta alima tasenba ya meimchirtemi taküm litettsü alima tasen ka lir kechiyong alima tasenba nung mopunga asen lima nung aliba ama aliba bushitetogo,” ta California kübok Moffett Field nung tentetba Ames Research Centre nung inyakba anünglak senzür, Jon Jenkins-i metetdaktsü.
Kepler-452b ta tenüng jajatsüba alima tasenba aser par anü na tetsüngdaji asen lima aser anü na ama pilar aliba bushiteta lir aser iba yongji alima tasenba nung meimchirtemi jemtetsüsüa tzüa alitsü akok ta anünglak senzürtemi imlar.
Meimchir taküm litettsü alima tasen bushitettsü nükjidong nung NASA-i 2009 küm nungi tenzüka par Kepler telescope amshiba osang bushitetogo.
Tan alima tasen bushitetba ya densema NASA-i par Kepler telescope amshia alima tasen 1,030 tashi bushiteta lir.