Chubawati NCS alima nungi pilaogo

Dimapur, March 03 (TYO) : Lakhuni nunger Nagaland Civil Service (NCS) nung ketdangser Wb. Chubawati Jamir Brehostibar anepdang 3:00 ako shi nung alima nungi pialogo. Pa arishi küm 89 liasü.
Asür Chubawati ya Japukong nungi mezüng graduate aser NCS officer liasü. Pa ya AKM tongti zülur aser JKM nunga tongti lenir ka liasü. Pa den asüpila sentep Hokolbar anepdang 9:00 ako nung par kidang Notun Basti, Dimapur nung alitsü.
Asür Chubawati alima nungi pilaba osang angashia asür kinungertem den mangyim jashi lemsatepba osang ka Parliamentary Secretary, Dr. Benjongliba Aieri metetdaktsüogo.
” Asür Chubawati ya ochishir aser mapa nung tenendak ketdangser ka liasü. Pai sorkar mapa nung dang masü saka lokti tenzükba mapa nunga tongti shilem agia aruogo. Pa ya JKM tenzüker rongnunga tongti ka liasü. Pa ama ka asübaji Ao kin asoshi takoksa tulu lir,” ta paisa metetdaktsü.