Turkey: Kinü tanur, Aylan asüba ken o nung Syria senso 2 merenshir

Istanbul, March 04 (Agencies): Turkey nung tentetba okadak kati Syria senso 2 küm 4 tashi tepuokdak puoka ayutsü temerenshi tanü, Hokolbar nü agütsüogo.

Syria nunger kinü tanur, arishi küm 3 tain Aylan Kurdi densema, nisung 5 tashi tzüyim nung arükseta yaküm, 2015 küm September ita asüba ken o nung aitsüba sülen okadaki tanü Syria senso anaji merenshir lir.

Rong ka nung mener Greece tonga aotsü meranger migrant nisungtem rong nung densemer, Aylan den külemi, tetsü aser teti na indang tasümang Turkey southwest tsütsülen tzüyimküm nung pongteta adokba sülen alima ajunga temulung kanga dang shirangdakja liasü.

“Ozüng alema nisung shibelenba ken o nung aitsüba sülen okadaki Syria senso 2 tepuokdak küm 4 ser ita 2 tashi puoka merenshitsü o bendang agütsüogo. Ajisüaka, metetsümonga nisung südaktsüba ken o nungbo okadaki tena metentsüogo,” ta Dogan news agency-i osang jangjashitsü.

Aylan asüba sülen linük 28 züngsemba European Union (EU) laksatsüsa Europe ajungai migrant nisungtem den sentakba khuret tulu benoksü tenzüka lir.

EU Council Tir, Donald Tusk-ia tanü Turkey semdanga par EU-i ajurushiba migrant nisungtem den sentakba khuret Turkey lenirtem den benokba osang jangjaogo.