Serbia Tir, Nikolic-i Parliament loksa; election agitsü sangdonger

Belgrade, March 04 (Agencies): Serbia Tir, Tomislav Nikolic-i Parliament loksaba sülen taruba April ita election agitsü osang ka tanü, Hokolbar nü sangdongogo.

Europe nung jenoka alitsü meranger refugee nisung meyirijang jenti par linük ajangdanga Europe bushia aoba ajanga bener arutsüba khuret den par linük rongsenren jenjang mejungi aliba mapang ka nung yimsüsütsü tashi abenba conservative yimtenren teloki yimsüsütsü tashi akangshitsü nükjidong nung par Tir-i tan election agitsü osangji sangoktsür lir.

“Parliament loksar election agia yimsüsür tasen shimtsü ozüng tanü, Hokolbar nü agizükogo,” ta shia, Serbian Progressive Party yimtenren teloki aniba teloktep sorkar anisang, Ato Kilonser, Aleksandar Vucic-i election agitsü mapang atongtsü küm 2 jakdang, tan agitsü ayongba election nunga takok ngudaktsütsü tebilemba aliba olen ka Nikolic-i tanü metetdaktsüogo.

“Tan election agia Cabinet tasenba shimba ajanga Serbia-i European Union (EU) nung züngsemtsü temeten angutsüsa rongsenren aser nungdakba temelenshi tajung agitettsü imlar,” ta taoba mapang nationalist tetsüti ka lir tang par linük EU nung züngsemdaktsütsü alizüng ayusang, Vucic-ia metetdaktsü.

West linüktemi nungitba opposition telok kanga tashi meiti aliba yong taruba ita agitsü ayongba election nung Vucic-i takok ngua maneni sorkar tasenba tentettsü maongka angutsü ta nübur timbaka indang tangatetba aliba osanga bushitetogo.