2010 nungi Mumbai nung company kati tetsür ita shilem aodang sodi agütsür

Mumbai, March 4 (Agenceis): 2010 küm nungi Mumbai nung aliba business company tila kati tetsürtem ita shilem aoba mapang sodi agütsür aser sodi agirtem indang ita sen majemi teti agütsüba agütsür.
Mumbai nung aliba Uttam Jain- indang, Shree Lakshmi Steel Industries nung tangbo mapa inyaker tetsür ka dang lir. Iba industry ya Mumbai anüolentip tsütsü aliba Kumbharwada tesem nung lir.
Ajisüaka tesüiba küm trok nung tajemba agi yangji mapa inyaker tetsür trok nem parnok ita shilem aoba mapang sodi peria agüja aruogo, aser ibaji ajanga kibong taginüba aser mapa nung temulung asür, ta Jain-i ashi.
Arishi küm 36 tain, Jain-i, “Ni iba inyakyim asoshi küm aika nungi bilema aruogo aser item tesüiba mapangtem nung tetsür ita shilem aoba mapang anogo pongunü tashi okrongba indang temai adoka jembitsübaji maksütsü o amai bilemba tensa ka liasü,” ta ashi.
Ajisüaka par kibong rangben den pa kinüngtsü nungeri nungita aser sobaliba nem malensepdaktsüi pa den inyaker tetsürtem nem iba ama timtem mapang sodi agütsütsü maparen tenzük.
“Ni tawa ang Bristol nung aliba British company, Coexist nung tetsür ita shilem aoba mapang sodi agütsür ta angashi aser iba osangji osang kaket ajak nung adoka kanga sapua züngtep…..ni iba ama inyakbaji mapa tulu ta mebilem, saka kü den inyakertembo 2010 küm nungi iba maongka ni agüja arur,” ta Jain-i Hokolbarnü IANS dang ashi.
Pai tetsürtem nem sodi agütsür aliba mapang rongdak mapa kar adokra kidang nungi inyaktsü ashir ajisüaka inyaktsü meinyaktsüji tetsürtem mulungji lir. Iba sodi ya sick leave ka ama mezüngshir mesüra mapai maru ama mezüngshir.
Karibo sodi mapang sen kwi ajemer agütsür ta asüngdanger aser idangjiang parnoki ni sen ajemer magütsüba jangja meteter, ta pai ashi.
Coexist company nung ya mapa inyaker pezüsü lemer asemsübo tetsür dang lir aser iba company-i tetsür ita shilem aoba mapang sodi agüja ita sen shitak angtsütsü metetdaktsüba osang angashir külen alima ajaki kanga tenüngsang agütsüogo.
Company aika nung tetsürtem ita shilem aoba ajanga mapai maodang ita sen ajemer agütsür.
Tang Shree Lakshmi Steel Industries nung inyakla, C Diva-i, ni ita shia iba sodi ya angur, ajisüaka kü ita sen teti anguba ama shitak angur, ta ashi.