NSCN(IM)-i Rahul Gandhi aitsür

Dimapur, March 4 (TYO): Hokolbarnü NSCN (IM)-i sangdong ka nung Congress tatong tir, Rahul Gandhi-i March 2 nü Lok Sabha nung August 3, Framework Agreement (3AFA) indang onük jembiba aitsüogo.
Arunachal Pradesh, Assam aser Manipur nunger taginüba anema India sorkar aser NSCN(IM) tsüngda tenangzüktep agi aser ibaji ajanga state asem nung alirtem mezüngmeshiogo, ta Rahul Gandhi-i jembiba aitsür ta NSCN(IM) sangdong nung shia lir.
“Congress party nung tatong tir Rahul Gandhi-i küm 70 den timba atsütepa aruba Indo-Naga yimten ken o süoki ia mebilemba atema Naga nungertem aoksar. India aser Nagalim tsüngda yimten ken o atema pai iba tashi jembiba angashidang kanga sasa bilemtsür” ta NSCN(IM)-isa metetdaktsü.
“Rahul Gandhi aolen ajak nung 3AFA anema jembiba Naga nungertemi ola madoki repranga aruogo saka March 2, 2016 nü pai Naga nungertemi magizüktettsüsa Lok Sabha nung o jembiogo. Küm 18 tashi Congress-i aniba sorkar kübok India aser NSCN tsüngda yimten onük jembia aruogo. Pa tebou Nehru, tetsü Indira Gandhi, tebu Rajiv Gandhi aser tetsü Sonia Gandhi nungertem ajaki Indo-Naga onük atema telemtetba ka agitsü mapa inyakba nung shilem agia aruogo. Süra, pai kechiba iba onük memetet ama jembir? India nung prime minister trok atongtepa Indo-Naga onük yimjung nung angatetteptsü atema tenangzükba agir mapa inyaka arur” ta NSCN(IM)-isa sangdong nung shia lir.
Rahul Gandhi-i election dak sendakba yimten mapa toktsütsü aser Congress-i yimsü asüba Manipur o Assam state tem pusema menoktaki India nung lennir ka ama sayutsü mepishir. Prime Minister Narendra Modi aser interlocutor RN. Ravi na lenisüba kübok India sorkar den 3AFA agiba nung NSCN masetshii noktaker, ta sangdong nungsa shia lir.