Pak-i kiralongrar pusemba anentsüla: BJP

Jammu, March 05 (Agencies): Jammu & Kashmir, Jammu district kübok, R S Pura sector nung aliba International arrtsülen India sepaitemi arrtsü adena aitba lungki ka anguba dak sentakba nung tanü BJP-i, Pakistan-i parnok inyakyim kanga kümdangtsüla aser kiralongraba pusemba anentsüla, ta metetdaktsü.
Tanü Jammu nung BJP Legislature Party lenir, Nirmal Singh-i, “Pakistan-i tanen makai India nung, talisa Jammu aser Kashmir state nung timtem agütsütsü meranger, aser iba ya süoki ia agitsü tebilemtsü ka lir. Pakistan-i parnok inyakyim kümdangtsüla aser kiralongraba pusemba anentsüla,” ta ashi.
Village Mela & Dinga Amb nung lokti senden ka nung jembidang BJP lenir Singh-i, “Tawa R S Pura nung lungki ka anguba ya süoki ia agitsü tebilemtsü ka lir, aser iba atema Ministry of External Affairs-i Pakistan den tongtepa jembidar,” ta metetdaktsü.
India-Pakistan arrtsü nung lungki talangka anguba sülen Hokolbarnü Border Security Force (BSF) sepaiemi Pakistan sepaitem den tongtepa jembiogo.
Brihostibarnü army post ka anasa BSF sepaitemi Pakistan tsütsü nungi India telungi lungki metre 30 tua aita aliba angu. 2012 küm nung tenzüker tang agi India sepaitemi lungki pezübuba angur lir.
Arrtsü adena aitba lungkiji tasazük feet 3×4 liasü, aser ali telunglen feet 10 shi ia atuba lungki liasü.