Yisu osang marudang Aoer tia

Temeim tembartem, Tsüngrem osang tajung Ao limai marudang Ao lima koma liasü iba indang tongmelang agi tatsü ka zülur. Ni lanuwa asüdang Aoer lia aruba tia ngur tambur kati yamai ashiba bilemteter:
1. Tzü mechiogo, tekolak aser bangsem o mesütok, anungji tasen angurtemibo tetsübutsü aser tesembatsü ka liasü. Dr Clark aser Godula nunger tamasa arudang koma repranger alitsü !
2. Tsükchir tsübuba agi akhi alui aodang teburi nok aser nü bener külemi dang senzü.
3. Tila tanur kidang ayutsü tsübuba agi tetsütemi teboklen tanur apong aser terongdong nung khu aben ta sür akhi alu taru tao nung senzü.
4. Ak aser an tsüin nung aser nisung atem nung mejang. Ak scü aser an scü menembaji par libaliro yimya liasü. Anungji aji shingaia balaka bilema mali asü. Ki aiben maoker, anungji azübong, antsük, meni aser nisung dak atsük kanga liasü.
5. Ayatrem nung shitsük adoka kidang nungi an bener ao.
6. Jendang tsük ayu majung shitsü shingoi tsük bushidang raksatsüba agi shingo meitetsüsa süra kilemji jungjunga mechibanga yanglu.
7. Mapang mapang shia yimdongi arem shiruru adokli tasa asü.Kechiaser akhidang prangpong mali nung shiruru dangji kecha meshitet mesüra meinyintet.
8. Yim meketa arem agi sakpanger liasü, anungji yim temeket nung ozü sangnu asatepba ola temenungratsüka liasü.
9.Tsükchir tsübuba agi arem yata mesenzü, anungji ayong nung tsüngin, akong aser ango peria ngua liasü.
10. Kodang nisung südir tsüin nung tsükten ama sadem yanglutsü aser idakji anembong anogo mesüitem tashi shitsü yima wazüka (aodaka) ayu. Anembong anogoji suitemer leperi bener aotsü aser idakjia sadem temer shirurui matongtsüsa azük nung ajungketa yanglur pakti kati zübangersa ayu. Iba meketa atsü tila ka atsü aser aji meketa la/ pa süoshi aser oset ajak yutsü. Ibaji tesempatsü aser temekongtsü den tetsübutsü ka liasü. Iba leper ajanga teshinem agi tesenzü majung liasü. Iba tasüba aser mang endokba yimya ya küm aika süiadoker asüba agi otsü ashir aikati junga memetetba agi ajakbo mezülur, saka melenshiyonga arur tatemsaba dang tera züluogo.
Temeim tembartem, iba tia aser yimya nung asenok lia aru. Ajisüaka, tangbo Yisu yimsü osang tajung aruba ajanga temelenshiba putu ka nung alir.
Ajisüaka, Ao lima ajak külemi dang melenshi masü saka mapang talang ka agia mapang balala nung yimsü aser education ajanga melenshia aruba otsü lir. Shirnoki tama Yisu yimsü osang tajung agizük parnok kibong aser yimtsüng tama melenshi. Aser tesü agizükertemji tesü pur ama menua melenshiyonga aruba otsü tanü tashi lir. Anungji Yisuji kotaki anitsü asoshi dangbo masü saka sobaliba tamajung, yimsü tamajung aser yimya tamajung ajak meleshitsür ka lir.