India sorkari küm ka nung inyaktetba indang sentong agi

Dimapur, July 24 (TYO) : India sorkari küm ka nung ajangzüktetba nung ajemdaker July 24, 2015 nü Kohima nung Regional Workshop den Special Outreach Programme ka agiogo.
Iba sentong ya Directorate of Field Publicity, Ministry of Information & Broadcasting (N&M Region)-i parnok Regional Office, Kohima nung ayongzüka agi aser omenji ‘Saal Ek Shuruaat Anek’ (Küm ka, Tetenzük Aika) liasü.
Iba sentong nung tongti tesemdangerji Pramod Singh, BJP State Executive züngsem liasü aser pai ashiba agi Centre sorkari mezüng küm nung nübortem ajangzüktsü asoshi scheme aika tenzüktsüogo.
Item mapatong indang osang jungjunga metetpelaba ajanga sensaksertem aser tangutsüpurtemi tajangzük angutsü, ta Pramod-i ashi.
DFP aser tanga media teloktemi sorkari tenzüktsüba scheme balala indang osang public nem kanga junga metetdaktsütsüla, ta paisa ayongzük.
Iba sentong nung tongti tesemdangerisa “Saal Ek Shuruaat Anek” ta ser sorkari küm ka inyakba indang kaket ka sayatsü.
Sentong nung mendenji Sonikumar, FPO liasü aser Jitendra Kumar Pradhan, FPO-i anküp tepela o jembi. Ano, mezüngbuba shilem nung Vivek Khuraijam, Unit-in-Charge Imphal aser technical session nung Robin Kashungnao, FPA na onir liasü.