Congress-i Naga accord indang sangdongbaji tamagitsü : Rijiju

New Delhi, March 7 (Agencies) : Congress-i Naga accord aitsüba aser Twitter nung iba dak sendakba osangtem metetdaktsübaji tamagitsütem lir, ta Minister of State for Home Affairs Kiren Rijiju-i Hombarnü metetdaktsü.
Indian National Congress (INC)-i parnok indang Twitter handle nung August 3, 2015 nü Press Information Bureau (PIB) sangdong ka adokja lir. Iba sangdong nung ‘PM-i India sorkar aser Nationalist Socialist Council of Nagaland (NSCN) tsüngda otsüsütsü aketba yimjung tenangzükba agiba kuli asür’ ta zülua lir.
Kasa tweet nung Congress-isa March 1 nü Rijiju-i Lok Sabha nung “Küm ishika India sorkari Naga Accord tenangzükba kecha magii” ta tezüluba nung agütsüba sangdong ka sayua lir.
“Parnoki anguba tapakji draft tejen ka indang liasü aser ibaji onok indang official draft masü. Ni onok indang official kaket reprangshimdaktsüogo aser iba nung Nationalist Socialist Council of Nagaland (NSCN) den ‘framework agreement’ agitepba dena lir” ta Rijiju-i tanü metetdaktsü.
“Anungji, Congress Party-i Twitter nung sangdongba osangji tai lir,” ta Rijiju-isa ashi.
Pai bangdak ketdangsertem dang sorkar indang official version sayutsü aser website nung tejen enoka aliba agientsü tetuyuba agütsüogo, ta Minister of State for Home Affairs-isa shisem.
“Lok Sabha nem agütsüba official paper nung onoki NSCN den framework agreement agiba indang onük dena lir” ta Rijiju-isa nenshia metetdaktsü.