Taoba LS Speaker PA Sangma mang remogo

Tura (Meghalaya), March 07 (Agencies): Tanü Meghalaya, West Garo Hills district kübok Tura nung nisung merirjang aikati taoba mapang Lok Sabha Speaker, P A Sangma mangyima asüpila sentong agiba sülen pa mang remogo.
PM Stadium nung asüpila sentong nung jembidang Meghalaya Chief Minister, Mukul Sangma-i, Purno A Sangma ya nüngtugu yimtenren lenir ka liasü, shibai Meghalaya aser northeast tesem linük aser alima den sentaktepdaktsü, ta ashi.
“Linük, Northeast aser Meghalaya-i pa mapa tajungtem teti bilemtettsü,” ta CM-isa ashi.
Tanü asüpila sentong nung India Tir, Pranab Mukherjee, Congress Tir, Sonia Gandhi, Catholic Bishops’ Conference of India, Odisha Angh, SC Jamir aser Arunachal Pradesh Chief Minister nungeri yokba osangtem zünga metetdaktsü.
Shillong nungi Lok Sabha MP, Vincent Pala-i, “Tribal tem rongnung mezüng Lok Sabha Speaker inyaksangji Purno A Sangma liasü aser pa ya, menürema Parliament ketdangsütsü akoksang ta bilemtettsü,” ta ashi.
Meghalaya Legislative Assembly Opposition lenir aser taoba state Chief Minister, Donkupar Roy-ia, Sangma-i pa nem chief minister inyaktsü maongka agütsüba lemsatepa liasü.
Tasümang Stadium-i bener mao tsüngda Wakbakgre nung par kidang sarasadem mapang ka agia liasü, aser iba sentong nung kinüngertem aser tembartem den Catholic Tura Diocese nung Bishop, Andrew R Marak nungeri shilem agi.
Asür Sangma indang mangji Linük Nisan agi longpang aser Walbakgre nung par kidang nungi Dikki-Bandi stadium tashi Meghalaya Police temi meiner ao.
Idakji asür nem 21-gun salute agütsü aser iba mapang Meghalaya Police band kati ‘Kü den liang’ ken atem.
State funeral agiba sülen pa mangji Tura nung aliba Bishop’s House anasa Catholic Cemetery nung arem.