Iran mitkartemi ballistic missile ishika tendanga kadoker

Dubai, March 08 (Agencies): Iran’er Islamic Revolutionary Guard Corps (IRGC) mitkartemi silos tongpang oset amshia ballistic missile ishika tanü, Mongolbar nü tendanga kadokba osang jangjaogo.
US-i par missile mapatong meinyaktsü asoshi benokba tenokdangba sentong anema inyaka, Iran-i tan par tongpang nung amshitsü missile-temji tendanga kadoker lir.
Iran-i yaküm, 2015 küm October ita medium-range Emad missile tendanga kadokba sülen iba amala mapatong meinyakdaktsütsü nükjidong nung Iran’er tongti shishilembaba telok aser teshimtet sensotem anema US-i tenokdangba sentong ita 2 tejaklen benoka lir.
“Ozü linük indang mitkar tashi ajemtsütsü nükjidong nung ozü arrürtemi ozü linük anema tenokdangba sentong tasentem benoker. Ajisüaka, ozü linük anema tenokdangba sentongtem benokba ajanga ozü ballistic missile mapatong menokdangtettsü aser ozü mitkar indang tashia ajema mekümtsütettsü,” ta IRGC’er aerospace kongsang nung commander, Brigadier General Amir Ali Hajizadeh-i metetdaktsü.
Tanü tendanga kadokba missile-temji medium-range Qiam-1 missile aliba aser kasaji kilometer 700 shi tonga oa kadokba osang jangjaogo.
Ano külen, Iran-i yaküm October ita missile tendanga kadokba ajanga par linüki United Nations Security Council (UNSC)-i yaküm July ita agiba Iran linüki tongpang nung amshitsü nuclear osettsüset bendentetba ballistic missile-tem metendangtsü tenokdangba anema inyakba osang ka United Nations-ia metetdaktsüogo.