Migrant nisungtem Turkey-i meyipa yoksü tezüngzüktep agir: EU

Paris, March 08 (Agencies): Tang Europe, talisa Greece nung jenoka alir migrant nisungtem Turkey linüki tanaben meyipa yoktsü tezüngzüktep ka Turkey linük den agiba osang ka European Union (EU) lenirtemi tanü, Mongolbar nü metetdaktsüogo.
EU nung züngsemba linük 28 nungi lenirtemi ita ishika jembitepa aruba sülen parnoki Turkey nem senotsü teyari taoba mapang nungi timba agüja migrant nisungtem yaridaktsütsü, Turkey nüburtem asoshi nungdakba visa tekaraba mapang nung renemtsütsü aser Turkey linük EU nung züngsemtsü alizüng tekaratiba mapang nung asangsang nung atalokdaktsütsü nangzüktepogo.
“Tan tezüngzüktep agiba ajanga Europe ajungai Turkey den amalitepa migrant nisungtem den sentakba khuret tajungtiba lenmang nung bentettsü imlar. Ajisüaka, EU senden ka taruba hopta amenba sülen ang iba tezüngzüktepji tatem küma agitsü,” ta France Tir, Francois Hollande-i metetdaktsü.
EU lenirtem tan March ita 17 nü senden mena tan Turkey linük den agiba tezüngzüktep tatem küma agiba ajanga Europe linüktemi par arrtsülen ajuruba migrant nisungtem den sentakba khuret taküm, 2016 küm tatembanglen tashi nung bentettsü teimla yua lir.
“Refugee nisung aser parnok indang temeten magientsüi tasa aser lenmang tajungtiba amshia migrant nisungtem den sentakba khuret bentettsü alizüng yua lir,” ta Turkey Ato Kilonser, Ahmet Davutoglu-ia tanü metetdaktsü.
Tan Syria nunger refugee nisung million 2.7 shi jenokdakja aliba Turkey linüki refugee nisungtem anepalutsü asoshi dollar sen billion 3.3 shi agütsüsemtsü asoshi EU den onük benokba osanga jangjaogo.
Greece linük jenoka alir Syria nunger refugee nisungtem par Turkey linüki anir oa idakji jenokdaktsütsü nangzüktepba sülen Turkey linüki tan teyari sen agütsütsü onükji benoker lir.