Taliban teloki yimjung senden nung shilem agitsü ajungshir: US

Washington, March 08 (Agencies): Taliban teloki Afghanistan sorkar den yimjung senden amentsü tajungshiba olen ka US-i tanü, Mongolbar nü metetdaktsüogo.
Taliban teloki yimjung senden nung shilem magitsü lemtetba ajanga par US aser Afghan mitkartemi Taliban telok anema taoba mapang nungi tesashiba raratsüsa akümtsü, ta shia, par teloki tan ayongba yimjung senden nung shilem agitsü asoshi US State Department otongdar, John Kirby-i metetdaktsü.
Afghanistan sorkar aser Taliban telok na tsüngda yimjung tezüngzüktep agidaktsütsü nükjidong nung Afghanistan, Pakistan, China aser US nunger densemba linüktemi aroki lungjemer Pakistan kübok Islamabad nung yimjung senden amentsü ayonga lir.
Ajisüaka, par teloki iba senden nung shilem magitsü lemtetba osang ka Taliban teloki taoba Honibar nü metetdaktsüogo.