Tripura nung SFI den raratepdang BJP pur pongu yiru

Dharmanagar, July 24 (Agencies): Dharmanagar, Tripura nung Student Federation of India (SFI) activist tem den raratepba mapang Bharatiya Janata Party (BJP) lanur pongu yiru.
Tenük küli ajanga ashiba agi, ABVP züngsem kati SFI züngsem akümtsü memulungba ajanga SFI activist temi azükba agi iba raratep adok.
Iba tatalokba ajang jashiba agi, ABVP activist aser BJP Yuva Morcha tem iba tesem nung sentepa lungkak ait meso.
Iba sülen SFI, ABVP aser BJP Yuva Morcha telok tem tsüngda raratep adok aser iba raratepba nung nisung pongu yiru.
“SFI teloki lungru agi aonba mapang police-i onok marakzüdaktsü. Idangji state nung BJP Yuba Morch nung tezülusang, Bhaumik tekolak yiru aser Dharmanagar nung makok Agartala-i anir ao. Ni yangji liasü aser teyiru ishika Dharmanagar mozü kidangi anir ao,” ta tenük küli angusang, Pranab Debnath-i ashi.
BJP Yuva Morch ( BJYM) Tir Kamal Dey-i, iba tatalokba aija ashiba mapang state nung Communist Party dak alia tanga party ka danga mayutsü, ta ashi.
“Yuba Morcha mesüra BJP den raratepba ajanga parnoki onok menokdangtettsü kechiba süra tanga state tem nung ama yangia BJP kanga tashi ita kümdar aser 2018 küm election nungbo nüburtemi BJP yimsüsüba arudaktsüner,” ta Dey-i ashi.
“Onoki Chief Minister dang ya dang shiner, na ya chief minister dang masü saka Home Minister ka lir aser onoki iba amala tatalokba aitsür,” ta paisa ashi.