Mapa inyakdak alitsüla

Peren nung District Planning & Development Board ( DPDB) senden nung chief minister, T.R.Zeliang-i sorkar tenzükertem dang pei mapa inyakdak aiener tesemdanger amato ka masü saka telidak süa lia nübortem tenzüktsüla ta metetdaktsüba oji kanga nüngdakba o ka metetdaktsüogo. Tanü Nagaland nung asentenshitsü nüngdakba tesem kaji sorkar tenzükertemi pei nem lemzüktsüba tesem nung telidak süa lia nübortem tenzüktsüba tesemji asütsü. Chief ministerisa tatishitsü tajung ka amshia ashiba ama, tamalen Nagaland state kümli küm 50 jakdang sorkar tenzüker T.P.Imchen nunger amabo Peren nung telidak süa lia nübortem tenzüka liasü. Iba mapangbo Peren nung kibong asem pezüka aliba dak alaka arem dang liasü. Iba ama tesem ka nung nübortem tenzüktsü asoshi  sorkari temulung lemteta yokba ama bendanga agüja tenzük. Iba amaji Naga nungertem rongnung Aortemi balaka teküpbok jenjang nung alir nübortem dang kanga meima sorkari kongi yokdir tashi anga oagi tenzük. Ibayongji, tanü Nagaland tesem ajaklen Aortemi mesemtettsüba office aser Aortemi lapoktsüba school-tem angutsü. Aji oda, tangari matongba aser mounüba tesemtem tonga oagi memetetba nübortem nüchi kümdakja sayutettsüba mapatemji Aortemi jangratema inyak. Iba tashi, sempet aser maongkaji tanüa Aortem dak keta lir. Ajisüaka, tanü Aortem dak tangari matongba aser mounüba tesem nempoka orr yangji shiruru tia nung alirtem den külemi lia tenzüknüba tejangraba aser tangatetba mali kümogo. Küm metsü shi jakdang tashi Naga nungersa süaka tangar kintemibo tangar kintem alidak oagi sorkar mapa inyaktsübaji memulungi liasü, anungji tangaleni yokra sorkar mapa nungi sodi meshi. Iba amaji tanüa Aotsür Aortemi anir pei mapa inyakdak tesem nung talir küma melinür, anungji mapa inyakdak mapa inyaka amongtsü melen hopta nung ken mesüra ita nung ken tesemdanger amai dang orr arur. Ibaji ajanga teinyakerji tekolok mainer aser deparment asür. Sorkar mapabo inyakner saka tenzüker teimbakati Kohima, Dimapur mesüra pei town nung dang lia tenzükner. Aji oda, sorkarbo tenzükner saka pei ki toktsür oagi mapa inyakdak lia sokar metenzükner. Iba jagi ita sen nungbo sen aika endoker saka sorkar tenzükertemi mapa inyakdak melinüba agi Nagaland merenloker. Akidangbo, teimbaka tetsüng agi jajaadang osangtsüsang bentep saka tanübo gari nung mener toudak nunga mobile phone nung sensaksema telemtetba agiba putu, anungji telemtetba agitsü mapang magir. Iba amaji nübortem asoshi terenlok mapa inyaktsütsübaji karaa inyaktsütetter. Atangji, tanü sorkar tenzükertemi bangpetsa jembibaji office-i anogo shia aoyonga mapa teinyaktsü maka, iba jagi maor. Ajisüaka, mapaji pei kolok aser shisatsü nungi adoktsüla. Office nung inyaktsüba mapaji sorkar nungi sentong yanglur yokbaji mapaji dang masü saka mapaji asenoki apitettsüla aser külem telongjem nung inyaktsüla. Office ka nung sorkar nungi yokba mapabo malitsüa akok saka azünga aliba mapang ka nung mera talila ka orr na alidak alir nübortem den külem ser sentong tapu balala inyak tenzükra, tagitsüjibo aji asütsü. Na kodang mapa inyakdak telidak süa lidir, yangji aliba yimten aser lokti nung shilem agia yaritettsü. Ibaji dang masü saka nai metetba mapa tasen karbo nai na alidak alirtem nem angazükdaktsütettsü. Akhidang, anüdoklen alir Naga kin aikati tsük lu ayim mashi asü, anungji Aor sorkar mesüra arogo tenzükertemi tsük lu ayimtsü sayu. Iba amaji süngjang lu ayimtsü sayu. Iba amaji pei alidak nübortem nem tajangzük agütsütsü lenmang aika lir. Aji oda, tanü sorkar tenzükertemi ano ken nübortem asoshi kong lidir liaka parnok den külemi timtem aser tepela tensa tia ajak lemsatepa alitsübaji sorkari masü Tsüngremi nungloktsüba mapa amato angateta inyaktsüla. Tangarbo asen tajung kümdaktsütsü asoshi tzüyimsa tzüyim ajanga aru saka asenokbo kidang kiyonger kidangia mouner ! Iba mulungjangji melenshitsü tim.