Assam nung AIUDF, BJP & AASU lennirtem Congress nung aden

Guwahati, March 8 (Agencies) : All India United Democratic Front (AIUDF) nungi züngsem 4000 aser tanga yimten telok balala nungi züngsem 1000 shi Mongulbarnü Indian National Congress (INC) nung denogo.
Rajiv Bhawan nung Assam Chief Minister Tarun Gogoi, APCC tir Anjan Dutta, Minister Rokibul Hussain, MP Gaurav Gogoi aser Congress lennirtem adenshia lia lokti züngsemba sentong agi.
Tanü Congress nung adenertem rongnung AIUDF MLA 2, BJP MLA ka aser All Assam Students Union (AASU) tanishirtem kar dena liasü.
45th Baghbor Loksabha Assembly Constituency nungi taoba AIUDF MLA küm ka tejaklen par party nungi züngdok aser tanü pa Congress nung denogo. Tanü pai “Badruddin Ajmal ji Maulana ama sayua ashikülaker nisung ka lir. Pa indang shishilemba maparen ajungkettsü atema dang pai Muslim nunger tenüng amer mapa inyaker” ta ashi.
Ano, Katagara constituency nungi AIUDF MLA, Ataur Rahman Majhar Bhuyan-ia Congress nung aden.
Taoba AASU tanishir Shankar Prasad Roy-i ita trok tejaklen Bharatiya Janata Party(BJP) nung aden aser tanü pa Congress nung denogo.
“BJP-i Assam nunger dak sendakba onüktem atema inyaktsü ta tamang kaa onok AASU tanishirtemi BJP nung aden. BJP nung adenba ajanga state nung lisopurtem temeten kümzüka yutettsü ta onoki bilem, saka mapang süia arudang, BJP-i Assam nunger indang tebilemtsü khurettem koktettsü atema tejangraba maliba ajitet. Parnok taginübatem atema dang inyaker” ta Roy-i tanü osangbener dang ashi.
“BJP-i sen alir nem ang tashi aser menden agütsür. BJP nung ochishirtem atema shilem mali. Takartemi dang jenjang tajung angutsü” ta AASU tanishirisa shisem.
Osang angazükba agi, taruba assembly elections atema Shankar Prasad-i Bongaigaon nungi tokteptsü atema BJP dang ticket meshi saka pa nem magütsü.
Anosa, Abhayapuri nungi taoba BJP MLA Maqbul Hussain-ia pa pusemer aika anir Congress nung aden.
Taoba AAKRASU adviser aser Koch Rajbanshi kin atema Kamatapur state aser ST jenjang meshia takhangba agütsür Biswajit Rai-ia Congress nung aden.
Tanü sentong nung Assam nung AASU aser Muslim Yuva Parishad tanishirtem den ex servicemen aika Congress nung aden.