Jilatem atema ‘smart plans’ nüngdaker : TR Zeliang

Dimapur, March 8 (TYO) : Nagaland kanga kara ainer anungji jilatem atema smart plan tem nüngdaker, ta Nagaland Chief Minister, TR Zeliang-i tanü ashi.
Mongulbarnü Shamator Town Council tenzüktsüdang Chief Minister-i ashiba agi, nübortem yimtsüng toktsür jila taküm libalirotsü meranger aser iba asoshi jilatem ajungkettsü atema ‘smart plans’ nüngdaker.
March 8, 2016 nü Shamator Head quarters public ground nung Shamator town council tenzükba sentong nung pai iba onük jembi.
Iba sentong nung tongti tesemdangerji Chief Minister TR Zeliang aser tetushi süa jaokerji RD & REPA Minister, C.L John liasü.
Sentong nung tongti tesemdanger o jembidang T.R Zeliang-i nübortem dang terenlok alitsü atema yimjung aser tesünep nung alitsü ayongzük.
Shamator jila kümtetba nung lennirtemi kanga kümdanga aser tebilemtsü khuret bena mapa inyaktsüla aser Shamator town council tentetba ajanga jila tali renloktsü, ta paisa ashi.
Shamator nung alirtemi pei sasa ketdangsütsü atema town council tenteter anungji iba jila nung aliba sensotemi iba maparen nung tangatetba tajung nung shilem agitsüla, ta TR Zeliang-isa ayongzük.
Yimtsüng tia nungi jila taküm melenshiba libaliroji alima ajungalen ataloker aser India sorkari smart town aser city tem nüngdakba ajiteta “Smart City” project apiteta inyaker, ta Chief Minister-isa ashi.
“Central Smart City project kübok mezüngokba jila aser yimtitem nunga terenlok atema ‘smart plans’ nüngdaker. Iba jagi ozü sorkari Department of Municipal Affairs ta ser department tasen ka tentettsü lemtet aser iba nung mezüngbuba ketdangserji Parliamentary Secretary, Tohanba lir,” ta paisa metetdaktsü.
Shamator ya Tohanba’er constituency lir, anungji pai iba town council inyakyim len ania reprangba dang masü saka sentong tajung atonga jila nung alirtem jangratema lidaktsütsü imlar, ta TR Zeliang-isa ashi.
Nübortemi bangdakpurtem den amalitep alitsüla aser pei temeket anepaluba den merükmejua ayutsü tangatetba alitsüla. Tuensang district ji Nagaland nung mezüngbuba district lir aser iba district ya state makümdang yongi tenteta liasü, anungji iba district nung alirtemi state tejakleni anitsüla, ta paisa ayongzük.
Mezüngpur ama Tuensang district nung alirtemi Naga nunger ka küma longjemtsü atema mapa inyaktsüla. Naga nungertem atema telongjemji kanga nüngdaker. Prime Minister Narendra Modi-i aniba India sorkari Naga yimten tebilemtsü lemtettsü atema mapa tenzükba aser Nagaland nung MLA 60 prongla iba kasa nükjidong atema longjemba mapang ka nung Naga nungertem longjemtsüla, ta chief minister-isa metetetdaktsü.
Iba ama tongtipang mapang ka nung public-i teka amteper aser Naga yimten teloktem ajak longjemer tekaratiba nung Naga yimten tebilemtsü atema telemtetba ka agitsüla, ta TR Zeliang-isa mepishia metetdaktsü.
Tanü Chief Minister-isa ADC Office Complex aser Town Council Office, Shamator lapoktsü.