Arunachal nung tanur 9 dak JE putet; 1 asü

Itanagar, July 24 (Agencies) : Arunachal Pradesh nung taoba anogo 10 tsüngda ita 11 nungi arishi küm 10 tsüngda tanur 9 dak Japanese Encephalitis (JE) aliba putetogo aser küm 7 tain tetsür chanu ka JE ajanga süogo, ta state health ketdangser kati ashi.
Arunachal State Hospital (ASH), Naharlagun nung aliba District Priority Laboratory (DPL) nung tendangdang tanur 9 dak JE tashidak aliba putetogo, ta State Epidemiologist Dr L Jampa-i ashi.
Lower Subansiri district kübok Kolaptukar tesem nung mezüng tanur ana dak JE aliba putet aser July 15 nü ASH Naharlagun nung arishi küm 7 tain tetsür chanu ka asü, ta paisa ashi.
Tanü nungi Dollungmukh nung Indoor Residual Spray inyaktsü tenzükogo aser iba mapa ya mezüng JE tashidak putetba tesemtem – Upper aser Lower Kolaptukar yimtsüngtem nunga inyaktsü, ta Lower Subansiri District Surveillance Officer, Dr Subu Habung-ia osangbenertem dang ashi.