London nung tebur 2016 Champions Trophy asayatsü

London, March 08 (Agencies): London kübok Queen Elizabeth Olympic Park nung 2016 Men’s Hockey Champions Trophy taküm, 2016 küm June ita asayatsü renemba osang ka International Hockey Federation (FIH)-i tanü, Mongolbar nü metetdaktsüogo.
Iba asayamong ya Argentina nung asayatsü asoshi mezüngbo sentong renem saka iba sentongji melenshia, iba asayamong London nung June ita 10 nü nungi tenzüka asayatsü lemtetshir lir.
Küm 4 tejaklen London nung Olympic takok marok agizüker, Germany’er tebur hockey asayar teloki Australia, Belgium, Britain, India aser South Korea nunger den Champions Trophy atema toktepa asayatsü renema lir.
Germany teloki par tetenzükba asaya India den June ita 10 nü asayatsü lemzüka lir aser Britain telokia Australia telok den mezüngbuba asaya asayatsü lemzükba osang jangjaogo.
Tetsür Champions Trophy asayamonga kasa asayadak hopta ka tejaklen asayatsü ayonga lir.
Argentina Hockey Confederation (AHC) den mangatettep ken o kar adokba sülen FIH-i Champions Trophy London nung asayatsü asoshi lemshiteta osang jangjaogo.
Ano külen, 2018 Women’s Hockey World Cup asayamonga London kübok Olympic Park nungsa asayatsü ayonga lir.