Africa o Nigeria na tsüngda tesendaktep jungdaktsünür: Zuma

Abuja, March 09 (Agencies): South Africa Tir, Jacob Zuma-i tanü, Bodbar nü agi anogo 3 buba asoshi Nigeria semdanga par linük ana tsüngda tesendaktep tajungba kümdaktsütsü merangba osang metetdaktsüogo.

Nigeria linüki totzü nungi senotsü aazükba maparen toktsür aluyimtsü aser ali telung nungi osettsüset tutetba ajanga senotsü aazüktsü mapatong tenzüka temelenshi tulu agiba mapang ka nung Zuma-i par linük semdangba ajanga par Nigeria linüki tangazükba tulu angutsü imlaba olen ka Nigeria Tir, Muhammadu Buhari’er Special Assisstant, Garba Shehu-ia metetdaktsüogo.

Par lenir anati tongpang nung amshitsü osettsüset yanglutsü densema, par linük ana kümzüka ayutsü maparen amalitepa inyakteptsü onük benoka jembiba osanga pai metetdaktsü.

S Africa nung tentetba mobile phone company, MTN-i tenüng mezüluoki SIM card amshirtem indang connectivity meraksatsüba ajanga par teloki Nigeria nung tentetba Boko Haram telok nungita yarir ta Buhari-i MTN telok aitsüba mapang ka nung Zuma-i tan Nigeria linük semdanger lir.

US kübok California nung tentetba San Bernardino yimti nung nisung 14 tashi kasetba den külemi, nisung 22 shi yaküm, 2015 küm December ita yirutsüsangi amshiba iPhone den sentakba miim osangtsüsang jungkai adokdaktsütsü nükjidong nung US Federal ketdangsertemi Apple telok anema okadak ken o benokba ama, Nigeria-ia tan MTN telok den mangatettep ken o benoka lir.