Michigan Primary: Sanders-i Hillary den temaba jenjang angur

Miami, March 09 (Agencies): Michigan nung agiba Democratic yimtenren telok nungi Tir candidate shimtsü tetoktepba nung Vermont Senator, Bernie Sanders-i taoba US Secretary of State, Hillary Clinton den temaba jenjang yashi, Mongolbar nü anguba osang jangjaogo.

America nunger shishilembar mongin, Donald Trump-ia Michigan, Mississippi aser Hawaii nunger nung par Republican yimtenren telok candidate-tem rong nung temaba jenjang anguba osang bushitetogo.

Nüburtem rong nung election agiba jakdangbo Hillary-i Michigan nung vote timba angutsüsa jenjang ngua aliba osang bushiteta liasü saka asangsang nungbo Sanders-i par Democratic telok pusemertemi agütsüba vote noklang nung shilem 50 ngua temaba jenjang anguba osang jangjaogo.

Michigan nung temaba jenjang monguaka, Hillary-i US anülulentip tsütsülen tentetba Mississippi state nungbo vote timba anguba osang bushitetogo.

“US Tir menden asoshi tokteper kati tangar mezüngmeshiba ajanga masü saka America nüburtem nem tajangzük tulu bener arutsütsü mangdang ayuba ajanga election nung takok angutsüla,” ta Hillary-i metetdakja liasü.

Ohio Governor, John Kasich-ia külem Republican telok nungi candidate ama tokteper, Ted Cruz sülen anidaka, vote noklang nung shilem 24 ngua par Republican telok nung 3 buba jenjang anguba osang angazükogo.

Ano külen, Democratic teloki Hillary shima taküm November ita agitsü ayongba US Tir election nung toktepdaktsüra, par Republican teloki tamakok angutsü ta Trump dak temulung melemteti küma, Republican telok lenirtemi Trump jenjang tamajungba kümdaktsütsü maparen tenzükba osanga angazükogo.