Iran-i maneni par missile tendanger

Tehran, March 09 (Agencies): Iran-i tanü, Bodbar nüa par tongpang nung amshitsü ballistic missile 2 tashi tendanga kadokba osang metetdaktsüogo.

“Ozü Islamic Revolutionary Guard Corps (IRGC) mitkartemi yashi, Mongolbar nü ballistic missile tendanga kadokba sülen, tanü, Bodbar nüa Qadr H missile 2 tashi kilometer 1,400 shi tonga kadoka tendangogo,” ta Iran mitkar lenirtemi metetdaktsü.

“Iran-i alima dang par mitkar tashi sayutsü nükjidong nung par missile tendanga kadokogo,” ta shia, Iran-i UN-i benokba tenokdangbaren anema inyakba atema US-i Iran aitsüba sülen tanabuba anogo nunga Iran-i par missile tanü tendanga kadoker lir.

Iran-i par missile yashi tendanga kadokba sülen par US-i United Nations Security Council (UNSC) nung Iran-i par linük anema benokba tenokdangbaren anema inyaka, par missile tendanga kadokba ken o benokba den külemi, par linük nem tapet telangzüba agütsütsü onüka benoktsü asoshi lemtetba osang ka US State Department otongdar, John Kirby-i metetdaktsüogo.

“Yaküm alima tashi abenba linük lenirtem den agiba nuclear tezüngzüktep nungbo Iran-i par tongpang nung amshitsü nuclear mapatong anentsü melena alimaia par linük anema benokba tenokdangba sentongtem agientsü nangzüktepa lir,” ta pai ashi.

“Ajisüaka, UNSC-i ballistic missile technology densema, tongpang nung amshitsü nuclear osettsüset bentetba missile-tem tendanga mekadoktsü tenokdangba Iran anema benoka lir aser par linüki iba tenokdangbaren anema tan inyaker,” ta Kirby-i osang jangjashitsü.