GST Bill atema PM Modi-i opposition teyari meshi

New Delhi, March 09 (Agencies): Bodhbarnü Ato kilonser, Narendra Modi-i Rajya Sabha nung GST Bill densema tanga bill tem agizüktettsü atema opposition party tem dang mepishiogo.

Taoba hopta Lok Sabha nung jembidang pai opposition Congress sashia aija jembiba ama masü saka Rajya Sabha nungbo pai kanga atsüanema jembiogo.

Onük jembidang Modi-i taoba mapang Ato kilonser, Jawaharlal Nehru-i jembiba o lepshia, Rajya Sabha ya shisatokdenba takdang ka lir aser Rajya Sabha o Lok Sabha na tsüngda amalitepa inyaktsü nüngdak, kechiyong anaprongji ketdangsüba nung shilem kaka lir, ta ashi.

“Asenoki Pandit Nehru tangatetba nung anidaktsü ta ni amanger aser tan senden nung bill ajak agizüktettsü ta ni amanger,” ta Ato kilonseri ashi.

Rajya Sabha nung BJP-i aniba NDA züngsemtem majority maliba ajanga Goods & Services Tax bill densema tongtibang bill aika magizükteter.

Modi-isa Tiri jembiba lepshia rongrong madoki Parliament junga kaketttsü atema züngsem ajak dang mepishi.

“Tan senden nungbo Parliament junga katetdar, Tiri jembiba angaba atema ni opposition dang pelaba metetdaksür. Tir onük mapa agi inyakbaji asenok atema nümatangtsü ka lir,” ta pai ashi.

Parliament junga katetba dak sentakba nung Ato kilonser Modi-i, yashi Lok Sabha senden yasüng ayaterm tashi katetogo aser anogo ana tejaklen Rajya Sabha senden menoa katetogo, ta ashi.

“Senden menoa mener sülen-a züngsemtem jarabangraa liasü. Kechiyong mapang talangka lir tang parnoki pei tebilemba Parliament nung jembitsü maongka angur,” ta paisa ashi.