School jungnüseta majunger

Nagaland nung sorkar school ajungtsü asoshi school education ministeri anir ketdangser tulurtemi mapang mapang shia tebilemba tajung benoka ajungshiteper. Aji oda, sorkar school nung tesayurtem tajung dang lir aser ano school kar dak alaka kiojena tajung dang yanglua lir. Ajisüaka majunger. Iba amaji Nagaland nung sorkar school-tem ya jungnüseta majungba tebilemtsütem bushiteta akoktsü merangtsübaji school education department khuret aser mapa tulutiba asütsü. Nagaland nung sorkar school majungba ya tesayur majungba agi mesüra meperiba agi masü saka kibur maliba school-tem amai yutsüba agi jungnüseta majunger. Kibur ali nungbo mapang mapang shia tesayurtem jadena ajungshitepba amaji school atema nüngdak ajak mapang shitak nung agütsütsü. Ajisüaka, tanü Nagaland sorkar school jungnüseta majungba kuli kaji tanurtem nem tazüngtsü kaket mapang shitak nung magütsütetter aser uniform-a shitak magütsür. Iba amaji Delhi nungi yokba teyaritem mapang shitak nung shitak lemsaa magütsütetter. Iba ama timtemji reprangteta, taoba hopta nung asenoki Nagaland nung Govt. School-tem ya free text book anguba sülen dang tenzük nunga koma süla (?) ta asüba nung tebilemba lemsatepogo. Atangji, küm shia school education department-i school lapok menepa tanurtem nem text book magütsütetter, anungji text book anguba sülen dang school tenzük nungang tajungba, kechiyong tazüngtsü kaket maka school-i aobaji tanurtem asoshi amajok lir. Ajisüaka, Nagaland nungbo kecha masü, text book dang masü saka tesayur maliyonga school-bo otetter aser tazünger maliyonga school-bo taküm alir. Tanü Nagaland aobaji iba ama tensa tia ka nung shitak o tiyazü na meyokteper mebendangtet aoer. Iba tensa tiaji bilemdangdangbo, school education nung inyakertem ajak anenang ta sünütsüka bilemer. Ajisüaka, alima ajungtsübaji aser department ka shitak küma yanglushitsübaji inyakertem anenba agi masü saka inyakertemi inyakyim tajungba küma melenshia inyak nung dang ajungtsü. Tangbo, school education department-i la kübok aliba school-tem kodang lapoktsüar memetet amai inyaker. Shitakba agibo, school lapokba mezüng anogoyongi tazüngtsü kaket ajak school nung alitsüla aser school uniform arrtsü asoshi tanur shia dang nungi tasazük shitak meshitsüla. Ajisüaka, tangbo tazüngtsü kaket maka school lapokdaktsür aser tanurtem temang masazük sür tapi agi uniform süoshi mashimashi arür bener arutsür. Ibayongji, süoshi agi tanur aika meyarir. Takümbo sorkar school-tem ajak nung uniform arütsü asoshi sü agütsür ta angazüker. Aji shitak süra, tangsa tang sorkar senpong nungi süoshi arürba taa dena agütsütsüla. Aji oda, tesayurtem ajungshia tanurtem dang tajungba sayudaktsütsü aser school metenzükdang tazüngtsü kaket aser uniform süoshi ajak shitak school ket tonger alitsü ta inyaktetra, ita ishika nung sayatenya agi ajunger ama school ajak junger alitsü. Ano, sorkar school jungnüseta kibur mali ama akümba agi majungbaji VEC mesüra WEC purtemi pei school ama bilema meinyaker. Ashiko, pei chirnurtem sorkar school nungji mazüngba agi asütsüa akok. Ajisüaka, kodang asenoki sorkar school-tem ya junga kümdaktsüdir asen semchirsemnur-tembo sorkar school nung dang azüngtsü. Tangar lima nungbo tesem aika nung private school-tem dang nungibo sorkar school tajungba lir. Ibayongji, yimsüsür aser tulurtem chirnurtembo sorkar school nung dang azünger. Iba amaji asen lima nung akaba sorkar school-tema kümdaktsütsübaji tasak masü. School Education department-i mapang shitak nung tazüngtsü kaket aser uniform shitak agütsütetra aser VEC aser WEC-temi pei meyong school ama bilema shisatsü tajung aser tesadem agi ochishia school tesayurtem ajungshia inyakra, sorkar school-tem ya mejungli asüyonga ajungtsübasa !