ANCSU-i lungkak aitba shilem tanabuba tenzükogo

Kohima, March 9 (TYO) : Bodbar nungi All Nagaland College Students Union (ANCSU)-i Technical Education Department nungi ochimashi agientsü takhangba agüja lungkak aitba shilem tanabuba tenzükogo aser ibaji poster campaign lir.
State sorkari onük asem takhangba agütsüba ama mapa meinyakba anema ANCSU-i tanü nungi lungkak aitba shilem tanabuba agitsü lemtet, ta ANCSU tir Zhoku Thuluo aser tongti tezülur Benjong Longchar nati metetdaktsü.
ANCSU-i lungkak aitba mezüngbuba shilemji March 5 aser 7 anogotem agi aser iba mapang lungkak ANCSU den züngsema aliba kaketshirtemi class nung medeni lungkak ait.
Hombarnü State sorkari Chief Secretary Pankaj Kumar ajanga ANCSU dang lungkak aitba sentong anentsü atema ashi. Ajisüaka, Chief Secretary-i züluba shidi nung kuli tejangja kecha maliasü aser takhangba onüktem inyaktsü shia mali. Aji agi ANCSU-i Chief Secretary-i züluba shidi magizüktsü lemtet aser temeten mangu tashi lungkak aitba sentong agitsü lemtet, ta ANCSU mendenpurtemi metetdaktsü.