Merenshitsüla !

Alima nung aibelenertem ozüng ajanga merenshiba ya aibelenertemji timtemdaktsütsü nükjidong nung masü saka tajung küma metongshitsütsü nükjidong nung merenshir. Atangji, aibelen kanga tulu asoshibo tasüba temerenshi mesüra taküm piyong tepuokdak ayutsüsa temerenshi agütsür, item temerenshitemjibo aibelenertem tajung kümdaktsütsü asoshi masü saka tangar asoshi tansütsü asütsü asoshi inyaker. Item ama lendong nisungtemji lokti asoshi tetsübutsü taküm asüba agi parnok nem iba ama taochi makaba temerenshi agütsür. Item temerenshitem dakji alaka tanga temerenshitembo nisung tamajungertem tajung kümdaktsütsü aser tarutsü nung loktiliba nung kanga kümdanga lidaktsütsü asoshi metongshitsüba sentong amato ka dang inyaker. Aji oda, kidang kibong nunga tanurtemi aibelendang mesüra tashi manga dang memerenshii taidoker yutsüra, item tanurtemji tajung makümer. Tanü nisung aika peisasa pei taküm mazüoktet aser ozüng küboka melitet yimten aser lokti nükenbelemdaktsüba nisungtemji teimbaka tanur asüdang kidang tsüraburtemi merenshitsüla mapang memerenshii taidok kisüng agüja intetdaktsüba nisungtem asütsü. Atangji, taidok agütsüba mapaji Tsüngremi mulungba saka tajung kümdaktsütsü asoshi aibelendang taidok magütsüi merenshitsüla mapa aika lir. Tatishitsü agi, nisung kari gari mashimashi aniba agi nisung tsükseta südaktsü saka paji pur tepuokdak ayutsü melen taidok agütsüra, pa jagi kodanga gari kümdanga manitsü, anungji ano tangar lendongi idaktsütsü. Iba kasaji tanuri auyadang memerenshii taidoker toktsüra anosa auyatsü. Ibayongji, aibelenertem dang Tsüngremia temeim agi merenshir ta jembir. Iba amaji tanü Nagaland nung aibelen aika lir saka asenoki ajak dang tai adoker. Ibayongji, tangari asenok ya matumalem amaia bilemer. Ajisüaka, alima ka shitak renloka aotsü aser nübortem tipdema tesünep nung alitsü asoshi kanga nüngdakba mapa kaji ozüng shitak amshitsüba mapa ya asütsü. Aji oda, kodang ozüng shitak amshidir, aibelener dang taidok magütsüi pei aibelen yari temerenshi agütsütsüla adoktsü. Tanü Nagaland nung RTI ajanga nisungtemi department aika nung tai inyakba aika putetter saka tai putetba sülenji tai inyakertem dak sorkari ozüng nung aliba ama merenshiba osang kangabo mangashir. Ibaji sen aika endoka senzür tesüsa tashidakbo putet saka tako asüba agi mozü mechidaktsüba amai lir. Iba jagi tanü asenok lokti shitak küma meyanglutetter. Tanga Mokokchung nung lanurtemi school nung tanurtem nem anüngdang chiyongdaktsütsü asoshi jang tamajung agütsüba putetogo. Ashiko, item ama jangji school kar nungbo ola madoki chiyongdaktsür alitsü mesüra ola madoki endoker alitsüa akok. Ajisüaka, tang amaji tangutsü tim shitak mangudang yimjak nung metetdaktsütsüla aser aibelener dak tapet temerenshi agütsütsüla. Jang tamajungji tajung agi melentettsü, ajisüaka iba jagi alima majungtsü aser jang tajungji melena agütsüyonga talangka moutettsü. Anungji, tanü majungyonga asüngbo aser yanübo asen lima aser lokti ajungtsü atema jang tamajungji shibai kong nungi bener aru (?) ta tatem tashi bushia orr aibelenertemji merenshitsüla. Tanü asüng sorkari nübortemi ola adoka longkak maitra, nübortem aliba jenjang mangu akümer aser kecha meinyaktsür. Anungji, lokti tentetter longkak aitba ya sorkar asoshibo nüngdak inyaktsüba file yoker amai agizüker aser idangjiang inyaktsür. Anungji, nübortem pei nübo aser rongsen endokyonga aibelenertem dak ozüngi melaba ama temerenshi agüjang ta longkak aita akangtsüsa akümer. Iba ama tanurtem taküm lendongi idaktsütsüsa inyakba mapa yabo jang tamajung agi tajung melentsüba dang masü saka AKM-ia dena jang tamajung yoksangji bushia merenshitsüla ta bilemer.