Ali tsütsü Assam police-temi Naga nunger kar pua lir

Jorhat, March 10 (TYO) : Mariani anasa Assam nungertemi Dissoi Valley ta ajaba tesem ka nung yashi Bodhbar nü Assam police-i Naga nunger nisung tenet puogo ta Assam nung len nungi yokba osang ka ajanga angzüker.
Assam police-temi ashiba agi, Mariani anasa Assam-Nagaland arrtsülen Naga nungertem kari Assam nunger li atsünga agitsü meranga aliba mapang ka parnok tenetji apu.
Parnok army ketdangser ka den pa meyong personal security officer dena liasü ta Assam police-temisa metetdaktsü.
Iba lendong ya Bodbar anüngdang 11:00 ako shi nung atalok. Parnokji Seuji Gaon ta ajaba tesem kati aru aser yangji alir yimtaklirtem dang yim toktsür oang ta amokmerena liasü saka yimtaklirtem jagi mao aser police-tem dang ashi, Idangjisa iba tesemji tonga ao aser Naga nungertemji apu ta paisa ashi. Naga nungertem jagi bena aliba 9 mm pistol ana, gari asem, mobile handset 5, kotari 2 rakzüka lir ta Assam police-temisa metetdaktsü. ” Onoki apuba nisungtemji Chief Judicial Magistrate, Jorhat ket nung agütsüogo aser iba nung jagi judicial custody-i yokogo,” ta Mariani police station nung OC, Jugal Kishore Kalitai metetdaktsü.
Paisa ashiba agi, parnoki pua aliba nisung tenetji ka Major Tosik Khaba (army officer) aser tangartemji Khaiukang Bongang, Tendung Aiyar, Thasansi Lakur, Bendung Aiyar, Prabin Birababe aser Anungba Lakur nungertem liasü.”
Parnok anemaji Marinai Police-i okadak ken o agütsüogo.