Assam nung AGP-i candidate 24 sangdong

Guwahati, March 10 (Agencies): Brihostibarnü Asom Gana Parishad (AGP)-i taruba state Assembly election atema candidate 24 sangdongogo.
Regional party, AGP ya state nung anabenren tashi sorkar tashi nung liasü aser tan election nung parnoki BJP den senteper tokteptsü.
State nung April 4 aser April 11 nü election agitsü.
AGP-i tang mezüng sangdongba candidate tem rongnung taoba mapang anaben Assam chief minister inyaksang, Prafulla Kumar Mahanta aser taoba mapang Education minister, Brindaban Goswami na densema lir.
Mahanta-i par jila, Barhampur nungi tokteptsü aser Goswami-i par constituency, Tezpur nungi tokteptsü.
Taoba mapang state Minister aser AGP lenir, Kamala Kalita-i Chaygaon constituency nungi tokteptsü aser party Tir, Atul Bora-i Bokakhat constituency nungi tokteptsü.
“Tang yimtenren tensa apir onok kijai tokteptsü makokba ajanga Congress sorkar tashii marudaktsütsü atema onoki BJP den senteper tokteptsü lemtet,” ta AGP Tir, Atul Bora-i ashi.
“Congress sorkar kübok asembenren tashi junga yimsü masüba ajanga Assam nüburtemi temelenshi ka aginer. Taruba election nung onoki menden 24 nungjagi menden aika nung takok angutsü imlar,” ta paisa ashi.