Sensaker tetsürtem LPG inoktsü asoshi cr 8,000 lemzüktsüogo

New Delhi, March 11 (Agencies): Brihostibarnü Centre sorkari sen crore 8,000 indang scheme agizükogo, koba ajanga sensaker kibongtem nungi tetsürtem nüngtem nung sorochokba LPG gas connection angati inoktsütsü.

2016 General Budget sangdongba mapang Union Finance Minister, Arun Jaitley-i iba scheme atema sen crore 2,000 sangdonga liasü, koba ajanga 2016-17 küm LPG crore 1.5 angati inoktsütsü.

“BPL (below poverty line) kibong crore 5 ayimjemtsü atema iba scheme ya ano tajemba agi küm anabosa inyaktsü. Iba ya ajanga linük tesem ajak nung cooking gas alitsü,” ta Budget benokdang jembidang Jaitley-i jembia liasü.

Yashi Cabinet-i iba scheme agizükba ajanga, iba scheme ya küm asembosa mapa küma inyaktsü imlar.

WHO-i bushisüngdangba ka tetshia Oil minister, Dharmendra Pradhan-i, sensaker kibongtem nungi tetsür lakh 5 shibo pei joka nung mokozü menemba ajanga asür ta bushitetogo, ta metetdaktsü.

“LPG scheme nung ya anema-alibaren shilem lir iba den külemi mopunga memenener,” ta paisa ashi.

Sensakertem timtemba dak sentakba nung Union minister Jaitley-i, “India nung tetsürtemi sorochokdang mokozü atakatemer. Iba tensa aneptsü mapang tongogo,” ta ashi.