Dimapur nung Excise dept nung nübo peria mali

March 11, 2016 nü Irrigation & Flood control Parliamentary Secretary aser DPDB Dimapur Chairman, Jacob Zhimomi-i DPDB senden nung o jembidang agiba noksa angur.

 Dimapur, March 11 (TYO) : March 11, 2016 nü Deputy Commissioner, Dimapur Conference Hall nung March ita atema Dimapur District Planning & Development Board senden menogo.

Iba senden ya Irrigation & Flood control Parliamentary Secretary aser DPDB Dimapur Chairman, Jacob Zhimomi menden ser agi.

Taoba senden nung lemzüktsüba ama Excise Department-i parnok department osang metetdaktsüdang, parnok nübo peria maliba ajanga mapa takok ngua meinyaktetba osang lemsatep.

Tang excise department kübok field staff 35 dang lir aser mapa takok ngua inyaktsü atema nisung 100 bosa nüngdaker, ta excise ketdangsertemi ashi.

Dimapur nung aliba hotel tem nung temesepba yi ayokba atema department-i koba tashi mapa inyaker ta DPDB Dimapur Chairman-i asüngdangdang, Excise department ketdangseri ashiba agi, nübo peria maliba, senzüsenbongtsü atema garitem peria maliba aser ketdangsertem asoshi security maliba ajanga mapa takok ngua meinyakteter.

License agütsüba atema langzüdang excise ketdangserisa ashiba agi, license ji Department-i masü saka DMC-i agütsür.

Excise department-i apubatem mapang shia raksa endoker aser January 2015 nungi December 2015 tsüngda senchi achiba nungi Rs. 32,45,500 tashi sorkar senpong nung enoktsüogo, ta ketdangserisa metetdaktsü.

Tan ita senden nung Department of Soil & Water Conservation-ia parnok department indang presentation agütsü.

Senden nung, school tasen ana Government Primary School, Ghokito Village, Kuhuboto, Dimapur aser Beanstalk School Lengrijan, Dimapur lapoktsü mulunga agizük.

Board-isa Spring Field School, Ruzaphema Block III, Dimapur agizük, GMS, Chekiye nungi GHS ajungkettsü aser District Evaluation Study on Hotel Management in Dimapur District nungertem mulunga agizük.

Taruba DPDB senden nung Fisheries aser Land Resource department temi osang lemsateptsü atema mapa nungloktsü.