Ochi aser sensak tia nungi nüchi !

Jawaharlal Nehru University nung kaketshirtemi linük nung ochimashi aser sensak tia nungi nüchiso aginür ta ayimtenba anema sorkar tashi nung policetemi kaketshirtemji pua tepuokdak ayuba aser Mokokchung nunga school kar nung tanurtem chiyongtsü atema jang tamajung agütsüba mapatem lanurtemi jungkai adoktsüba anema Mokokchung Deputy Commissioner-i lanurtem aija amokmerenba tensa tia naji kanga mesükteper amai bilemer. Aji oda, sensak tia nungi nüchiso aginür ta kaketreju nung ayimtenba aser tanurtem nem jang tamajung agütsüba anema ola adokbatemji ozüng raksaba mapatem süra nübortem sensak tia nung aliba aser tanurtem nem jang tamajung agütsüba mapatemjibo ozüngi melaba mapatem asü ta bilemdangtsüba mapangji tang asütsü. Atangji, linük nung ozüng raksaba mapatem mittsü aser nokdangtsü asoshi police-tem lir saka item ozüng raksaba mapatemji nokdangtsü atema nübortemi meyarira police-tem kijaibo makoktsü. Ibayongji, Nagaland nunga dena ‘Community Policing” indang jembir. Aji oda, ozüng raksartem azüoktsü aser lokti sünepa alitsü asoshi nübortem nem khuret angatetdaktsütsüba dak alaka nübortemi mapa tamajung inyakba anema mita aobajiang administration-i aitsüra nübortem asoshibo nüchiso anguba limaji yangji atemer asütsü. Tanga state ka nung asünungbo school nung jang tamajung agütsüba osang noksa dena sangdongli administration-i dena item tesemtemj bushia oagi bushisüngdang tenzükla. Ajisüaka, asen lima nungbo jang tamajungji shibai kong nungi agütsü ta bushia merenshitsübaji masü saka shirnoki kodaser iba ama mapa tamajungji jungkai adokja jajar ta bushia merenshitsübajiang tuluba aser shitakba amai kümogo. Aji oda, school tanurtem chiyongtsü jang tamajung agütsüba indangbo mangu aser  mangashi kümer jang tamajung agütsüba mapa bushia jungkai adoktsübajiang ozüngi memelaba, anungji CrPC ozüng ajanga item nisungtemji merenshitsü akok ta administration-i metetdaktsüba onük indangjiang ano tebushidangnütsüka aser tejembinütsüka, anungji tang ken o memekongdang aser nübortemi mamadokdang, lanurtemi iba onük nung shisatokden ka ayongzüka akatsüla. Iba ama ken o adoka jembiba mapang yagi asen nübortem tangatetba nung aientsü aser alima tejakleni aotsü. Ashiko, jang tamajung agütsüba mapa aser otsüji amadokdaktsütsü asoshi bangdak nung alirtemi mashilen nungi nübortem shisaboludakja mesüshir asütsüa akok. Ajisüaka, tang CrPC ozüng tetshia lanurtem amokmerenba agi Mokokchung majungtsü aser ozüng raksaba mapatem ajak police nem shiloka toktsür nübortem ajemajema kazünung asen lima majungtsü. Aji oda, nübortem tangutsü tim manguba indang, nübortem nem chiyongtsü tajung melena tamajung agütsüba indang aser nübortem lendong nungi kümzüktsüsa inyakba purtem nem tenüngsang aser sempet agütsütsü melen CrPC ozüng tetshia ajemajema kümdaktsütsü merangra asen nübortembo alemli yimtak sepaitemi atsü atsübanger lidaktsüba tia tuagi alutsü. Tang Mokokchung town nung nübortem ashioktsüba mapatem kar lanurtemi putetba yabo telong nung remoka aliba ochimashi mapatem tilaka juteta adokba angurba dang asütsü, saka tulubalenkabo nübortemi mangur aser aji mengudaktsütsü asoshi CrPC ozüng agi amokmerener asütsüa akok. Item ochimashi mapatemji bushia metongshitsü aser asen lima ochimashi aser sensak tia nungi nüchiso angutsü atema lanurtemi dang masü saka nübortem ajaki mitttsüla. Iba ama pei lima aser nübortem meima ochimashi mapatem mita oa inyaker Mokokchung Town Lanur Telongjem ama nembo, aitsütsü melen, Independence Day ama tongtibang anogo nung Administration-i tenüngsang sempet agütsütsüla. Iba jagiang  nübortem ajak mulungjang nung ochimashi anema inyaktsü ajungshitsü aser ochishia inyaktsü mulungtettsü.