Telok 24-i 7 buba Silver Cup asayamong nung shilem agitsü

Kohima, March 12 (TYO): Nepali Baptist Church Kohima Youth Department (NBCK YD)-i ayongba 7 buba Silver Cup Twenty20 (T20) Cricket Tournament nung Nagaland aser Assam na nungi ajak agi telok 24-i shilem agitsü renemba osang jangjaogo.
NBCK YD-i par sports ministry den sentaktepa kümshi ayongba T20 asayamong ya taküma ‘Peace & Unity through Cricket’ omen nung ajemdaker tan March ita 16 nü nungi tenzüka Kohima kübok Jakhama Ground nung asayatsü ayonga lr.
Tan asayamong nung shilem agitsü renemba telok 24 rong nungi Kohima nungi telok 16, Dimapur nungi telok 3, Mokokchung nungi telok 1 aser Assam kübok Diphu nungi telok 1 aliba osang tayongertemi metetdaktsüogo.
Ano külen, Youth Director, Lotha Baptist Church Kohima, Renthungo Kikon tongti jembir süa NBCK nung asayamong fixture renemba osang jangjaogo.
Police Union Baptist Church aser Friends Cricket Club telok nati tan asayamong tetenzükba asaya asayatsü lemzükogo.
Tan asayamong nung takok angur telok nem takok marok aser kulikaket den senpet sen 70,000 aser tanabuba jenjang angur telok nem tanabuba jenjang takok marok aser kulikaket den senpet sen 25,000 agütsütsü renema lir.
Semifinal asaya nung tamakok ajurur telok anaprongla nem senpet sen 5000 agütsütsü renemba den külemi, Highest Scorer, Highest Wicket Taker aser Best Wicket Keeper densema, individual shilem nunga tangar den tajungba asayartem shima parnok nema sempet aser senpet balala agütsütsü renemogo.