Real Madrid-i International Champions Cup takok marok agizükogo

Real Madrid teloki International Champions Cup takok marok agizükba sülen pelatepa arok noksa agitsü asoshi ataba yangi angur.

Melbourne, July 24 (Agencies): Portugal nunger football asayar mongin, Cristiano Ronaldo densemba Real Madrid teloki International Champions Cup takok marok tanü Hokolbar nü Melbourne yimti nung agizükogo.
Real teloki goal 4-1 agi Manchester City madak final asaya koka tanü takok marokji agizük.
Taoba mapang nung 10 ben tashi European champions akümtsü jenjang ngutetba Real telok striker, France nunger Karim Benzema-i tanü asaya tenzüker minute 21 buba nung mezüngbuba goal agüja par telok temaba jenjang nung ajungkettsü.
Mezüngbuba goal agütsür minute 4 süir külen, minute 25 buba nung Ronaldo-i külem asayar, Toni Kroos-i agütsüba pass agizüka par telok asoshi tanabuba goal agütsü.
Real defender, Pepe-ia asaya mezüngbuba shilem tembangtsü minute ishika anünga alidang par teloki asoshi tasembuba goal agütsü.
Tasembuba goal agütsür mapang tatsüka lir külen Real asayar, Sergio Ramos-i pa teka agi ball dak kongshiba yong City teloki penalty metsütsü moangka angu.
Yaya Toure-i penalty ball-ji takok ngua metsüba yong par City teloki goal 1-3 jenjang ngua mezüngbuba asaya shilem tembang.
Tesülen, asaya tembangtsü minute 17 anünga alidang Isco-i yanglutsüba cross ball agizüka Russia nunger Denis Cherychev-i pezübuba goal agüja par Real telok nem takokba bener arutsü.