Kesha sapurtem New York nung lungkak ait

March 13, 2016: Tawa kentener, Kesha sapurtemi Sony Music ketdangsertem dang la den tezüngzüktep agia aliba nungi la chioktsü atema takhangba agüja lungkak aitogo.
‘We R Who We R’ ken atenla Kecha-i tang Sony aser subsidiary, Kemosabe Records kibur producer, Dr. Luke dang la record contract aliba agientsü atema akhanger.
Hokolbarnü la sapurtemi Sony’s headquarters kima tang agi asembenbuba takhangba agüja lungkak aitogo.
Lungkak aiter nisung 35 shi adenshia nisung 411,000-i sign asüba kakettem nung temepishiba aika agüja liasü. Ozülu kar nungbo “Tang Kesha talenba nungi salajang” ta zülua liasü. Parnokisa “Tim mapa inyakang”, “Tajangzük dangi nungibo nisung taoba!” ta ayimtena arishi küm 29 Kesha-i atenba kentem nung tsüngsanga liasü, ta Associated Press osang ajanga metetdaktsü.
Sony atema okatsür, Scott A. Edelman-i, küm 10 tejaklen Kecha-i producer den agiba contract ji agientsüsa company tang jenjang nung mali, ta shiogo.
“Item tensa ka nung Sony-i kentener (Kesha) atema ajak inyaktsüdar, saka temzüng nung ajemdaker, contract agientsüji makoktsü,” ta Scott-i jembiba o New York Times ajanga metetdaktsü.
Kesha-i ozüng inyakyim ajanga iba contract agientsü atema raraba nung Kelly Clarkson, Reese Witherspoon, Lorde, Adele, Lady Gaga, JoJo aser Ariana Grande nungeri nungita yaridar. Iba den külemi Taylor Swift-ibo yimjak nung Kesha yaria la nem US sen 250,000 agütsüogo.